Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

1.

Чипер инке каçма çинче

кĕпе çăвать,

ик çара пĕç асамласа

куçа пăвать.

Пуçа ыр шухăш

тин çитет,

ара, анне ман

кин кĕтет…

2.

Вăтанчăк хĕрччĕ,

халĕ - арăм.

Пепкемĕре парсассăн кăкăрне

илемлĕ намăслăх çине пăхма

çапах та

хăяймарăм.

3.

Хăрах алли вĕçертрĕ

тӳммине,

тепри вăтанчăклăн

хупларĕ

кăкăрне.

4.

Хĕрарăмсем пляжра-мĕнре

сĕтеклĕ шанкă пек

хĕртĕнеççĕ.

Килĕсене каяççĕ те

пас тытнă йывăç пек

витĕнеççĕ.

5.

Хĕр кăкăрĕ

куян пуçĕ пек,

каччă куçĕ

хăлат куçĕ пек.

6.

Тăхта!

Ан хывăн хальлĕхе,

эп

куçăма хупам…

1974, нарăс.

Мана çуралсассăн чĕнмешкĕн пĕлмен,

вара «Витали» ят хурать Иртемен.

Атте ăшшине ачаран эп туйман,

çавăнпа хушамат та кукаç ячĕ ман.

Чиркӳ каткинче кăшт йĕпетнĕ пуçа.

Юрать чĕрĕк ĕмĕр пĕччен хам хуçа.

Чĕре тăвăлать, тăкать вут-хĕмне,

кĕмешкĕн ыйтать поэзи тĕнне.

Анне ăнланать, Микул турă, каçар.

Мана çĕн тĕнре халь чĕнеççĕ Сăвар.

Аннеçĕм, пилле, пуçăм тăрăх шыв яр,

поэзи çĕрне талпăнать сан Сăвар.

Сисмерĕ тесе хутаçа ан тултар,

сăмах вут чульне ытларах кăна пар.

Чĕре кăварне тытан сăвăра

пĕлсем ӳлĕмрен Эртиван Сăвара.

Кăшкăрсам, хĕр ача, кăшкăрсам,

ют çынсем мĕнех калĕç курсан?

«Савнă чух пулăшу кам чĕнет», –

хĕр ача çумарах тĕршĕнет.

Ик тута çăрапа питĕрнет,

пурçăн çиплĕ йĕке пĕтĕрнет.

Çинçе çип ăнсăртран татăлсан

сыпаймасăр ан йĕр татăлса.

Хĕр чысне чĕркесен шур пӳспе

çыхма илĕн-ха çакă çипе.

Тепĕр ир – çын курман пумилкке,

каялла çаврăнан пĕр йĕке…

19.06.1974.

Алик Петрова

Юлташăм, куратн-и, çитет кĕркунне?

Кам савмĕ ун ылтăн та капăр тумне

Часах уйрăлатпăр, часах ăсату, —

Кĕтет сана пысăк хула, институт.

Халь эсĕ каятăн; анчах та нихçан

Пĕр тантăшсемпе туслăха эс ан ман.

Уйри сукмака, шăматкун каçсене,

Ачалăхри пысăк çут ĕмĕтсене.

Эпир ак юлатпăр кунтах. Вăтам шкул

Пире те çул парĕ. Анчах килес çул...

Сана ăшăтинччĕ ман савнă салам,

Телей те сĕнем, ырă сывлăх сунам.

Ăсла-шухăшла, сан ĕçӳ тӳпере

Çӳретĕр вĕçсе çӳлерех, инçерех.

Юрат çынсене, пул хастарлă ялан,

Тăван халăхна нихăçан та ан ман.

Юлташăм, часах-çке çитет кĕркунне

Çитет пĕркенсе капăр ылтăн тумне.

Часах эс каян вĕренме: Сывă пул,

Сунатăп сана чи телейлĕ кун-çул.

«Виснер хĕрне çитсессĕн»...

(«Арçурирен»).

Илĕртет чуна çурхи илемлĕх,

Тишкерет ман куçăм пит инçе.

Тантăшсем, çӳрер-ха асилмелĕх

«Арçури алхаснă» уйсенче.

Çулпала утатпăр васкамасăр,

Ак, ем-ешĕл курăклă Виснер.

Ку çырма çынчен эсир мĕн калăр?..

Сăвăçа, атьсемĕр, асилер.

Сылтăмра поэтăн тăван ялĕ,

Çĕнелсе çĕкленнĕ Хурапха.

Лавраçа, Хĕветĕре тек халĕ

Арçури çӳреймĕ хăратса.

Пирĕн сăвăç çав ялта çуралнă,

Ячĕ унăн—ĕмĕр хисепре,

Вăл—тăван поэзие пуçарнă,

Ырă ĕмĕт суннă вăл пире.

Чунăма туртать кунти илемлĕх,

Куçăм тинкерет-çке инçете.

Тантăшсем, çӳрер-ха, асилмелĕх

Федоров юратнă уйсенче.

Çĕр çулхи юман тымарĕпе

çĕре ыталанă –

çĕр,

çилпе кĕрешме пар ăна вăй-хăват!

Çурхи Атăл аллипе

çăлсене ытамланă –

тан таппи,

юхăмна вăйлатма пар ăна вăй-хăват!

Çӳлте ăмăрт кайăк вĕçет,

çунатне сарса янă.

Ик çунат,

тӳпене çĕкленме пар ăна вăй-хăват!

Р.Гамзатова вуласан

– Каяр манпа, маттур?

– Ăçта?

– Çук, кирлĕ мар.

Юл çакăнта.

– Каяр манпа, маттур?

– Каяр!

– Утна эс йĕнĕрле.

Каяр!!!

1974, нарăс.

Хунямасен хăмли

çурхи хĕвелпеле,

çу кунĕнчи ăш çумăрпа,

шит тăршшĕскер,

ши! кайрĕ.

Ара, курмастăн-им,

шалçа пек пĕвĕме

хăмла аври пек арăмах

хĕвелсенчен

хупларĕ.

…Хăçан татать-ши хуняма

хăмла?

23.01.1974.

Ирсерен эп ăна тĕл пулатăп ялан,

Ĕçчен хĕр манран ир вăранать.

Кăвак сăн ӳкерсен шурăмпуçĕ яла

Çăл патне шыв ăсма вăл анать.

Шăнкăр шыв йĕрленсе ыткăнать валак тăрăх,

Йăлкăшать кĕмĕлленнĕ витре.

Кăвак куçĕ хĕрĕн çăлти шыв пекех тăрă,

Çутă ир пек сăн-пичĕ хитре.

Шурă хурăн, эс тăратăн

Сарпике пек ман умра.

Лăпкăн-лăпкăн хумханатăн, —

Вăрăм пӳлĕ те кăтра.

Пĕчĕк чух илсе килсеччĕ

Сана эпĕ вăрмантан.

Эс чеченччĕ те имшерччĕ,

Ун чух хам та эп айван.

Илемлентĕн, пысăклантăн,

Сана çук халь паллама.

Тараватлăн йыхăратăн

Сулхăнна ларса канма.

Ĕнтĕ эп те çитĕнетĕп,

Сывă ӳсрĕм çултан-çул,

Çитес çул ак пĕтеретĕп

Эпĕ, тусăм, вăтам шкул.

Ман ачалăх иртсе кайрĕ,

Час кĕреп арçын шутне.

Юрату та çулăмларĕ

Манăн çамрăк чĕрене.

Çамрăк тусăм, шурă хурăн,

Эсĕ пĕчĕккĕ чухне

Сан çинчен хывсаттăм юрă,

Юрласаттăм çуркунне.

Хамăн савнă хĕр юрлатчĕ

Çав юрра хăшпĕр чухне.

Çĕклететчĕ, çунтаратчĕ

Сассипе поэт чунне.

Ăна эпĕ юрататтăм

Мĕнпур чун-чĕремĕмпе.

Яланах çунатланаттăм

Шанчăкпа та ĕмĕтпе.