Елена Аксупи

Елена Аксупи (чӑн ячӗ Елена Геннадиевна Селиванова-Алексеева) — чӑваш ҫыравҫи, журналисчӗ. 1973 çулхи кăрлачăн 28-мĕшĕнче Аксу районĕнчи Беловка ялĕнче çуралнă. Тӑван ялти пуçламăш, Кивĕ Тимушкелĕнчи вăтам шкулсенчен вĕренсе тухнă. 1990–1995 çулсенче Шупашкарти Чăваш патшалăх университетĕнчи чăваш филологийĕпе культура факультетĕнче аслă пĕлӳ илнӗ. 1995 çулхи çурла уйăхĕнчен пуҫласа Чӗмпӗрте тухакан «Канаш» хаҫатра вӑй хурать.

Пӗрремӗш хайлавӗ 2000 çулта Чӗмпӗрти чăваш çыравçисен «Шевле çути» литература альманахĕнче кун ҫути курнӑ. Тĕрленчĕкӗсемпе прозăпа çырнă хайлавӗсем «Ял пурнăçĕ» (Тутарстанри Аксу районĕнчи чăвашла хаçачĕ), «Хыпар» издательство ҫурчӗ кӑларакан «Чăваш тĕнчи» тата «Чăваш хĕрарăмĕ», «Сувар» (Хусан), «Канаш» (Чӗмпӗр) хаçатсенче, «Тăван Атăл», «Атăл юрри» (Чӗмпӗр) журналсенче пичетленеҫҫӗ. 2006 çулта «Телей çăлтăрĕ хыççăн» кĕнеке пичетленсе тухнӑ.