Тен, ахаль мар

Нестор Янкас | Сăвă | 1939 | 503


Хумхантарать йĕкĕтсене

Тӳп-тӳрĕ пӳ, тăп-тăпăл пӳ...

Тен, ахаль мар хапха умне

Çурта пек хурăн лартрăн пуль,

Юратнă тусăм?

 

Çырла питсем! Вĕсем çине

Ӳкеççĕ ют куçсем ялан...

Тен, ахаль мар крыльца умне

Лартса ӳстертĕн пуль палан,

Юратнă тусăм?

 

Кăвак куçсем! Çамрăк чĕрем

Хăрать вĕсем тĕс тăкасран...

Тен, ахаль мар кăвак сирень

Ӳстертĕн пулĕ пахчара,

Юратнă тусăм?

 

Кăчкă çӳçсем! Вĕсем çине

Хăратăп эп юр çăвасран...

Тен, ахаль мар сад варрине

Сар хӳшĕ аврăн хăваран,

Юратнă тусăм?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем