Шупашкарăн кӳлли

Геннадий Юмарт | Сăвă


Шупашкарăн кӳлли — çутă кӳлĕ,

Çуталать шур хула варринче.

Таçтанах курăнать илĕртуллĕ,

Кăмăл уçăлĕ ун хĕрринче.

 

Шупашкарăн кӳлли – вăрăм кӳлĕ,

Çутатать керменсен сăн-питне.

Яп-яка ун тавра хывнă çулĕ,

Чуптарать çăмăл кимĕ хумне.

 

Шупашкарăн кӳлли – тулăх кӳлĕ,

Фонтанран кĕмĕл шыв пĕрĕхет.

Аякран та курмашкăн çын килĕ,

Кӳлĕ уншăн — кĕтмен ĕрехет.

 

Шупашкарăн кӳлли – янкăс кӳлĕ,

Чĕнтĕрленĕ кĕпер сас парсан

Тĕрлĕ халăх юрри килĕшӳллĕ

Янăрать çыннисем туслăран.

 

Шупашкарăн кӳлли – хăтлă кӳлĕ,

Хӳтĕлевçĕ-анне пуррипе.

Инçетре те сана унăн пилĕ

Савăнтарĕ пайтах ыррипе.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: