Электронлă вулавăш

Вăрçăран таврăнаççĕ, шăпланăр, —

тухре куççуль сăрхăнса.

«Ăçтарах-ши ĕнтĕ упăшкамăр,

чĕрĕ-ши е юлнă выртса?»

Çук, калама васкамаççĕ, тăнла:

сан чуну çеç сисет хурлăха.

Таврара макăраççĕ, кулаççĕ, —

тем те пулать вăрçăра.

Упăшку... ăçтарах-ши вара,

юлтăнах-ши халь эс тăлăха?

йынăшать халь тавра...

хăшĕсен пур сăлтав савăнма.

Эс шыран мăшăрна...

Вăхăт çук калаçма,

макăрма та-çке кайнă манса.

Çурçĕр çилĕ кăна, тен, сисет хурлăхна,

ачашлать сан çӳçне вăтанса,

вăл каласшăн иккен:

— Ан шыра, пурпĕрех кăлăхах,

ылханан вут-вăрçа...

Çук, таврăнмарĕ апла...

Юлчĕç-ши ачусем тăлăха?

— Таврăнмасть? Намăс мар-и суйма?!

Упăшку вилĕме парăнма пултарман.

Эс кĕтетĕн ăна чăтайми шăрăхра,

шартлама сивĕре е тӳлек каçсенче...

Апата ларсанах пĕр кĕтес пуш-пушах:

Тен, вăл кĕрĕ те ларĕ çиме?

— Килеймест пуль тесе,

вăл вилнех пуль тесе,

ан та хăйччăр килте пуплеме.