Электронлă вулавăш

Çынтан çын кулать-и?!

Манран кулакан — макăрать…

Иртен-çӳрен сăмахĕ

1

Чулхулана кайма тухнăччĕ.

Перрон çинче пĕр чун та çук.

Чугун çул станцинчен пĕр çын тухрĕ те, эпĕ йышăннă сак çине пырса ларчĕ.

Чылай вăхăт иртрĕ. Хаш сывлать иртен-çӳрен.

— Тарас килет — ăçта тарас? — терĕ вăл ăнсăртран.

Эпĕ чĕнмерĕм. Илтменçи турăм.

Çак çын каллех калаçу пуçласшăн пулчĕ.

— Ахтунг! — терĕ вăл. — Василий Иванович!

Эпĕ хамран кулнă пекех туйрăм. Чĕнмерĕм.

— Гутен морген! (Ырă кун!) — терĕ иртен-çӳрен.

— Ауф фидер зейн! (Сывă пулăр!) — çавăрса хутăм эпĕ сиввĕн.

— Вер бист ду ден? (Эсĕ кам?) — чарăнмарĕ вăл.

— Вас браухст ду? (Сана мĕн кирлĕ?) — парăнмарăм эпĕ.

— Вас мёхьтест ду? (Эсĕ мĕн ятлă?) — тăсăлчĕ малалла калаçу.

— Ви хайст ду? (Санăн яту мĕнле?) — тепĕр майлă çавăрса хутăм эпĕ…

Тем вăхăт тăсăлатчĕ ĕнтĕ калаçу. Анчах иртен-çӳрен йăл! кулса илчĕ те çапла хушса хучĕ:

— Гештатен зи михь форцуштелен! (Сирĕн умăрта!) — Микулай!

— Эпĕ те Василий Иванович мар — Тарас!...

2

Икĕ чăваш аран-аран пĕр чĕлхе тупрĕç.

— Микулай мучи, эсĕ вара мĕншĕн нимĕçле калаçатăн? — ыйтрăм эпĕ. (Вăл манран чылай аслă пек туйăнчĕ). — Эсĕ нимĕç–и?

— Çук, тăванăм. Эпĕ — чăваш… «Нимĕçсем» — çурма чăвашсем, сехет каялла Шупашкар еннелле Мускав пуйăсĕпе ларса кайрĕç. Пĕри те, сан пекех, чăвашла пуплемест. Тĕлĕнмеллипех тĕлĕнтĕм, апăрша! Эпĕ нимĕç чĕлхи вĕрентекенĕ пулнă.

— Чăваш чăвашран кулнине эпĕ те курнă, çавăнпа калаçу пуçлама йывăртарах. Каçарăр тархасшăн!

— Пирĕн асанне ун пеккисене «виçĕ дипломлă тăмсай» тетчĕ. Хăйсем…

Анчах калаçу, яланхи пекех, вĕçленеймерĕ. Манăн каймалли вăхăт çитрĕ.

Тем каласа парасшăнччĕ ĕнтĕ Микулай мучи?!...