Поэзишĕн тип йĕркесем кичем-тĕр...

Поэзишĕн тип йĕркесем кичем-тĕр:

Романтика сахалтарах-и, тен?

Чăн пурнăçа савса та шĕкĕлчентĕр

Сăмахăм ман — эп çĕр çинчи этем.

Романтика! Сан илĕртӳллĕ, тĕпсĕр,

янравлă та пăлхавлă тӳпӳнте

вĕçекенсем хăш чух юлаççĕ тĕксĕр —

нумайăшпе пуплетĕн эс тӳнтер.

Килте усранă çуллă, самăр хурăн

çуначĕ пур та — вĕçеймест инçе.

Ун шăпине ăмсанмăп эпĕ: курăн —

ман шухăшлавăн урăхла виçе.

Романтика! Сан сывлăшна пĕрех

ӳпке туллия сывласчĕ чиперех.

Çĕнĕ комментари хуш