Ясмин чечекĕ — шур чечек...

Валем Ахун | Сăвă | 1953 | 574


Ясмин чечекĕ1 — шур чечек,

Савни, парам сана савса.

Кавруç пиччейĕн пахчинчен

Пĕçертрĕм кĕçĕр эп каçса.

 

Каçарччĕ теп, Кавруç пиччей,

Хуçсаттăм эп савни валли.

Эс ху та-çке, Кавруç пиччей,

Калаççĕ: пулнă хĕр вăрри.

 

Çураçăп эпĕ сар хĕре,

Йĕртессĕм çук эп сирĕн пек.

Тĕллевĕм пулчĕ ман пĕрре:

Парне парасшăнччĕ чечек.

 

Ясмин чечекĕ — шур чечек...

Тухатлă юррăн илтĕнет;

Тарай тутри пекех чечен,

Савса памашкăн хĕтĕртет.

 

...Каçартăрах Кавруç пиччей,

Пуçтах эп пултăм пуль, эккей.

 

1953, Кипеккасси

 
1 Ясмин чечекĕ (вырăнти сăмах) — жасмин

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: