Кĕçенет яш ăйăр витере

Валем Ахун | Сăвă | 1995 | ăйăр | çуркунне | 532


Кăтра сăртсем сип-симĕс. Çуркунне.

Юпахсем çӳреççĕ çеремре.

Хура курак вырнаçнă йăвине,

Тăри сикет сенкер тӳпере.

Кĕçенет яш ăйăр витере,

Çӳресшĕн яш ăйăр ирĕкре.

 

Çурхи шыв-шур тамалнă çырмара,

Сухаçсем тухасшăн акана.

Ама хур та сас пачĕ урамра:

Йышне чĕнет умри лапама.

Кĕçĕнет яш ăйăр витере,

Вылясшăн яш ăйăр ирĕкре.

 

Хĕр-каччă каçпа тухать урама,

Юррисем янравлă та хавас.

Пуçласассăн ятуллăн ташлама —

Пĕлĕтре вĕçет пек пирĕн кас.

Кĕçенет яш ăйăр витере,

Чупасшăн яш ăйăр ирĕкре.

 

1995. Кипеккасси

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: