Электронлă вулавăш

1

Кĕрхи çĕре кĕске тума,

Ăш вăркасан канăç тупма

Савниçĕмччĕ!

Хама кура хура кăна,

Анчах пĕрре куракана

Йăл çиçĕмччĕ!

2

Сăнне курсассăн сывлăш пӳлĕнетчĕ!

Хăй шӳт туса: «Савмастăн пулĕ», — тетчĕ...

Çӳçсем шуралчĕçĕ, чĕре хавшарĕ,

Вăтанчăк сăнĕ халь те манăçмарĕ.

3

Шăк-шак! илтсен чупса тухатчĕ,

Тăрать тумланнă-тумланман,

Шел тутăр çыхнă-çыхăнман,

Ятран чĕнетчĕ, уртăнатчĕ.

Лутра кăна та тăпăлккаччĕ —

Ытам ăшне кĕрсе ӳкмелĕх;

Пĕр пĕçертсе пĕр çӳçенмелĕх

Вĕри сывлăшĕпе лăпкатчĕ!

Пĕрре куçран пăхса кулмаччĕ! —

Тертӳ те çук, нушу та çăмăл.

Хăпартланса çĕкленнĕ кăмăл

Тĕл пулуран тĕл пулăваччĕ!

4

Сулмак çивĕтсене тытассăм çук,

Туту хускалнине сăнассăм çук.

Яш-кĕрĕмĕн вылянчăк телейне,

Хамран иртсен тин ăмсанассăм çук.