Ылтăн сăрăпала сăрламашкăн пуçларĕ...

Николай Теветкел | Сăвă | хĕвел | çуркунне | 550


Ылтăн сăрăпала сăрламашкăн пуçларĕ

ман умри шур хута тараватлă хĕвел.

Уçăлать пек ăшчик: йывăр тунсăх, шĕвел!

Сан пăрна шарт! çурса, халь утать сăвă çарĕ.

 

Çыхăн, ылтăн кĕлте, хывăн, ылтăн çĕмел:

йăлкăшинччĕ пĕрмай ĕçлĕ кăмăл кăварĕ.

Чĕрере çуркунне ахальтен-им юрларĕ?

Ĕçĕм пытăр ăнса, пурнăç пултăр тĕкел.

 

Чи хавас ĕмĕтрен вăй илен сăмахсем

кĕлтуни пек анчах илтĕнсен, хăш чухне

шухăша сӳлетен туйăмсем çуралаççĕ.

 

Тĕлĕнетĕп шалтах тепĕр чух, тăвансем:

кам пытарнă хĕвел савнă тусăн чунне?

Сивĕре те ачаш чечексем çурăлаççĕ!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: