Электронлă вулавăш

Василий Николаевич Евсеев шкулта библиотекарь ĕçĕсене туса пырать. Ыт ахальтен тенĕ пек, Мишша тавăрса панă кĕнекесене илчĕ те уçкаласа пăхма пикенчĕ. Ак тата, страницăсене вараласа пĕтернĕ — ыйтупа кăшкăру паллисем, виç кĕтеслĕхсем лартса тултарнă. Тепĕр кун Василий Николаевич Лесковăн кĕнекине Мишша илсе пынă-пыман хăй умĕнчех тĕрĕслерĕ. Страницăсем тап-таса. Юлашки таса листи патне çитрĕ те такăнчĕ: пĕтĕм страницăна алăпа çырса тултарнă. Тепри пулсан тӳрех кăшкăрса пăрахмалла. Евсеев вара вĕриленсе каймарĕ, мĕн çырнине ăшра вуласа тухрĕ.

— Пит тимлĕн вулатăн-çке эсĕ, — терĕ юлашкинчен. — Анчах та страницăсене ан варала. Таса хут ил те çырса пыр шухăш-кăмăлна. Е хăв вуланă кĕнекесен дневникне пуçла.

— Юрĕ, — килĕшрĕ Мишша. Ăçта кайса кĕрĕн. — Хăш-пĕр кĕнекисем пирки ахаль те çырса пыркалатăп.

Мишша килне пуш алăпа каймарĕ. Вербицкая çырнă «Телей уççисем» кĕнекене ыйтрĕ.

— Пирĕн библиотека пысăк мар. Эс вуламан кĕнеке юлмарĕ пулĕ, — терĕ Евсеев.

— Çук та пулĕ. Халĕ учительсем панисене вулатап, — тавăрчĕ Мишша.

Тепĕр эрне иртрĕ. Мишша библиотекăна тепĕр хут çитрĕ.

— Ăçта çӳретĕн вара, Кузьмин? — ыйтрĕ тӳрех Василий Николаевич. — Мĕншĕн килмерĕн?

— Интереслĕ мар ку кĕнеке, аран-аран вуласа тухрăм, — тавăрчĕ унччен маларах илнĕ кĕнекене.

Библиотекăран пушă алăпах тухса кайрĕ. Евсеев хăнăхнă йăлапа Мишша вуланă кĕнекене уçкаларĕ. Кĕнекен таса листи çине хут татки çыпăçтарнă, ун çине пысăккăн: «ЕРУНДА», — тесе çырса хунă.

Мишша библиотекăран пурпĕр писмерĕ. Тепĕр виçĕ кунран пырсан çӳлĕк çинче Некрасовăн «Сăвăсен пуххийĕ» тап-таса тăнине асăрхарĕ вăл.

— Куна вара никам та илсе вуламасть-и? — тĕлĕнчĕ вăл. — Мана парăр-ха.

— Вуласшăнах мар. Эсĕ хăв ăна пĕрре илнĕччĕ-çке.

Хăвăртах тавăрса пачĕ Мишша Некрасовăн сăввисене. Унччен те пулмарĕ вăл вĕренекен класри ачасем пĕрин хыççăн тепри ыйтма тытăнчĕç нумаях пулмасть усăсăр тăнă кĕнекене.

Вăрттăнлăха В.Н. Евсеев тавçăрма çеç пултарчĕ: Мишша чаплă агитатор мар-и?

Шăматкун Мишша тăван Касаккассине таврăнчĕ. Пĕрле М.Н. Загоскин «Юрий Михайловский» кĕнекине илсе кайрĕ. Вырсарникун пуçтарăнсан ял ачисене унăн хăш-пĕр сыпăкĕсемпе паллаштарчĕ. Ирĕксĕрех кĕнекене тепĕр эрнелĕхе парса хăварма тиврĕ.

— Анчах ан варалăр, кĕнеке çине ан çырăр, — асăрхаттарса хăварчĕ хăй. Чăн-чăн Евсеев тейĕн.