Хăмла пахчинче

Кăмăлĕ кăшт кутăн кĕркуннен.

Уяртать пăртак. Пулать кĕç ăмăр.

Киленсе сăна та — ан ĕнен —

Нимĕн систермесĕр тăкĕ ярĕ çумăр.

Усăсăр ан ирттĕр кун пачах, —

Ӳркенмесĕр хăвăрт ĕçе тытăн.

Сиплĕ техĕмпе сывлать пахча,

Илĕртет куçа «сип-симĕс ылтăн».

Пиçсе çитнĕ сар курланкисем

Йăлтăраççĕ, чăн та, ылтăн тĕслĕ.

Тухăн та уя курма тесе,

Ытараймăн — ăмăртуллă ĕçлĕн.

Сарăлать таçтан хăмла пахчи —

Каш-кашлать кас-кассăн вăрман евĕр.

Тăрăшать асли те шкул ачи...

Ытарми вĕсен юрри-пуплевĕ.

Алсерен — çемçе курланкăсем.

Хĕр упраç кăтри пек курăнаççĕ.

Юрласа хăмла татаç хĕрсем.

Ĕмĕтре, тен, пил курки тытаççĕ.

Çĕнĕ комментари хуш