Пултару

Митта Ваçлейне асăнса

«Пуç янисен юрри», «Элеги».

Семенов Тайăр-и е ху...

Сана та касрĕ çын элекĕ,

Пĕрех манмарĕ халăху.

Тăван чĕлхен таса хĕлхемĕ, —

Вăл — Çеçпĕлте, вăл — Тайăрта...

Татах çĕкленчĕ ун илемĕ

Хăйпе илсессĕн сан ятна.

«Хĕн-хурлă пултару саманчĕ,

Ăна пĕлмен поэт — айван», —

Тесе чун тарĕпе çырсаччĕ,

Калла килсессĕн аякран.

Тухмарăн эс уксах-чăлахăн

Поэзин аслă пуссине.

Шырарăн вутлă чăн сăмахăн

Асамлă, иксĕлми вăйне.

Ăста тăлмаччĕ — пултараттăн, —

Куçартăн Горький романне.

Эс Пушкинпа та çывăхлатрăн

Тăван чĕлхемĕр техĕмне.

Асрах-ха сан «Малашлăх маршĕ», —

Чĕнет, хистет янравлă сас.

Ăна пĕлет тус, кӳршĕ-аршă,

Ăна кашни илтме хавас.

«Пин юрăран пĕри... юлайтăр», —

Тени пулмарĕ кăлăхах.

Сăпай поэтшăн курнăç ют вăл,

Чăн пултару анчах паха!

Çĕнĕ комментари хуш