Электронлă вулавăш

— Тйевога! — шартах вăранать хĕрача.

Вут пек пĕçерет кĕлетки.

— Лăплан-ха, — тет амăш, — ку тĕлĕк анчах,

Юмах аташтарнă пекки.

— Анне, хăвăртрах аяла, путвала!

Илтместĕн-им, бомба ӳкет!

— Ачам, пĕчĕкскерĕм, ан çуйăх ытла,

Çук бомба кунта, шеремет.

— Ăçта пирĕн Вовка? Нинук ма тăман?

— Эй-яй, пĕчĕк çеç айванкка,

Халь тек кирлĕ мар вĕсене вăратма,

Вĕсем кайрĕç пит аякка.

Вĕсем халь çӳреççĕ çӳлти пĕлĕтре,

Хитре сад пахчи хӳттинче.

— Мĕнле сад пахчи вăл? Курасчĕ пĕрре...

— Пĕлместĕн çав: аслă тĕнче.

— Унта çăкăр пур-и? Кала-ха тата:

Унта сивĕ мар-и, анне?

— Унта çын выçмасть. Хĕл те çуккă унта.

Пит лайăх унта çынсене.

— Аннеçĕм, атя-ха эпир те каяр!

Паян пулмасан та... ыран.

— Тен, кайăпăр та-и... Анчах халех мар —

Аçу таврăнсан вăрçăран.

— Тулта тем юрлать, тем юрлать çил-тăман,

Темскер калаçать тĕнчепе.

Ача çак çула пĕр нушасăр тухман,

Çыврат, çил-тăман, çак чĕппе.

Çыврах, Ленинград хĕрачи, паппа ту.

Ĕнен: чăваш килĕн ăшши

Сунать сана тăнăçлăхпа юрату,

Сунать сана хăтлă çĕр-шыв.