Каларăшсем

Петĕр Ялгир | Шӳтлĕ сăвă | 674


«Ыр ут çынна таптамасть,

Ыр çын çынна хурламасть»,

Тенине пĕлет Хумма,

Пурпĕр хурлать хăть кама.

 

«Çын валли шăтăк ан чав.

Лекĕн, теççĕ, ху унта».

Çакна пĕлнипех Питрав

Çĕр айне чикет Тита.

 

«Ик мулкача йĕрлекен

Пĕрне те тытайман», тет.

Çакна шеп пĕлсех Евген

Пур ĕçе те кӳлĕнет.

 

«Ан мухта хăвна, тет Ял,

Мухтаччăр çынсем сана».

Пурпĕрех çӳрет Миххал

Мухтаса хăйне кăна.

 

«Каймăн ултавпа инçе»

Тенине пĕлсе тăрсах,

Улталать тек Униççе,

Уямасть те намăса.

 

«Васкакан вакка сикет»

Тенине илтмен-ши Влас?

Пĕрмаях чупса çӳрет,

Такăнса ӳкет час-час.

 

«Пĕччен йывăç час ӳкет»,

Нил çакна шута илмест.

Пĕчченех ялан çӳрет,

Тус тупмашкăн сĕмленмест.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: