Вунтăватă асамлă йĕрке...

Вунтăватă асамлă йĕрке, —

Вăл сонет-мĕн, — чуна илĕртет.

Вăл сана хитре хĕр пек тиркет.

Хăшпĕр чух: «Вăййа тух!» тет, чĕнет.

Çав тери тĕлĕнтермĕш иккен:

Пур саккунĕ, йăли те пăли.

Пайлаттармĕ чуна вăл икке,

Вăл — савнин, юратун ыр кулли.

Çавăнпах-тăр мĕнпур сăвăçсем

Сонета хĕрсене халалланă:

«Эсир Пурнăç та Юрă, Илем!..»

Тенĕ май, чĕререн хавхаланнă.

Пур вĕт манăн та Турă çырни —

Ĕмĕрех çумăмри чун савни.

Çĕнĕ комментари хуш