Электронлă вулавăш

Тырă-пулă акса пурнăçа сиплеме юрататăп, —

Эпĕ çын аллинчи çăкăра хапсăнма пултараймăп:

Уй-хирсен пурлăхне вут ан хыптăр тесе ал пусатăп.

Кĕмĕл тĕслĕ кермен тӳпене çĕклеме юрататăп, —

Эпĕ çын йăвине сĕмсĕрле йышăнма пултараймăп:

Йăлтăрти çуртсене вут ан хыптăр тесе ал пусатăп.

Мир кĕввиллĕ станок умĕнче ĕçлеме юрататăп, —

Киленӳллĕ, хаваслă ĕçрен ютшăнма пултараймăп:

Çакă ĕç хатĕрне вут ан хыптăр тесе ал пусатăп.

Уçлăхри сĕмлĕхре çĕнĕ çул-йĕр хывма юрататăп, —

Çунатсем пур çинче эп вĕçмесĕр тăма пултараймăп:

Уçлăхра та ыр туслăх ан пĕттĕр тесе ал пусатăп.

Кăмăл хĕрнĕ чухне çĕнĕ юрă хывма юрататăп, —

Чун кĕвви хистевне итлемесĕр тăма пултараймăп:

Вăрçă ĕçĕ тек ан кĕттĕр тесе ал пусатăп.

Ĕмĕрсен еткерне юп курса упрама юрататăп, —

Эп ăна вăрçăра çунтарса кĕл тума пултараймăп:

Этем тунă илемлĕх ан çĕттĕр тесе ал пусатăп.

Савнă çыннăм ытамĕ савса кĕтнине юрататăп, —

Çĕнĕ çул пӳрекен çак асамсăр юлма пултараймăп:

Вут çине ăна вăрçă ан вăртăр тесе ал пусатăп.

Ачасен сассине, вăййине-куллине юрататăп, —

Эп ăна кăвартан сыхламасăр тăма пултараймăп:

Пурнăç йывăçĕ ĕмĕр ан хăртăр тесе ал пусатăп.

Сар хĕвел çутине, ешĕлкке тĕнчене юрататăп, —

Алхасан вут куçне шыв сапмасăр юлма пултараймăп:

Тĕнче тĕнĕлĕ шанчăклă тăтăр тесе ал пусатăп.