Хресчен

Уй-хирте ырми-канми ĕçленĕ атте-аннене тата ял-йышăма халалласа

Сап-сарă тырă пуссинче

Тăри юрри чуна çĕклет.

Ăш варкăш çилĕн кассинче

Тĕнче пин кĕвĕлĕн сĕрлет.

Хресчен каçалăкне кĕрет

Çĕн çăкăра пуçланă пек…

Хĕвелпеле çунса хĕрет

Ĕç умĕнче вăл кунĕпе.

Ĕçре хуралнă питĕнче

Сӳнми телей тапса тăрать.

Хресчен çăл куçĕ патĕнче

Çĕр шерпетне хуллен ăсать.

Унтан, ак, канăçлăн çăтать:

«Эх, техĕмлĕ те сивĕ шывĕ!».

Хĕрӳ хĕмрен çăл куç çăлать,

Этем каллех вăй-халлă, сывă.

Çĕрти тыр-пулă кăшăлне

Вăл: «Курăр, пирĕн ылтăн», — терĕ.

Эп туйрăм çыннăн кăмăлне, —

Хăй ĕçĕпе çакна пĕлтерчĕ.

Çĕнĕ комментари хуш