Электронлă вулавăш

Пуçтартăм эпĕ юрă-кĕвĕ

Хитре чечек суйланă пек.

Ăна упрарăм хĕлĕн-çĕвĕн

Чун хӳттипе, чун ăшшипе.

 

Мĕн чухлĕ ĕмĕр сыхă тăтăм

Таса сăпкийĕ умĕнче.

Тăшман юрра ан сăхтăр вăрттăн,

Ан вилтĕр юрă çынсенче.

 

Суранлăран тута-çăварăм

Хăш чух асапсăр уçăлман.

Çапах та çепĕç сасă-çаврăм

Манран пĕрре те уйрăлман.

 

Вăл чĕтрени суранăм тăрăх

Куçатчĕ çал таппи пекех.

Юнпа пĕвеннĕ ăшăм — шăрăх,

Эс çеç сиплеттĕн тек-текех.

 

Мана сĕнетчĕ çĕнĕ кĕвĕ

Вăрман та, улăх та çырма,

Йăлт реквием юрланă евĕр

Асилтеретчĕç шăпама.

 

Таçта лере арканнă килĕм

Час-час курнатчĕ тĕлĕкре.

Урсах йĕрлетчĕ сивĕ вилĕм

Ялăмсене кĕре-кĕре.

 

Анчах ман юррăм — ман чĕремçĕм —

Вилмерĕ. Эпĕ те унпах.

Пĕтмерĕ ытарми чĕлхеçĕм,

Пĕрлешрĕ юрăпа сăмах.

 

Çĕн самана ман кĕввĕме те

Вăй-хал пиллерĕ çĕр çинче.

Чăваш сăмахĕн илемне те

Яланлăх упрĕ çут тĕнче.

 

Ман туйăмсен хĕрӳллĕ хумĕ

Ялта е хулара шăвать.

Илемлĕ кĕвĕ — халăх сумĕ,

Кун-çулĕнчи таса хăват.

 

Пуçтартăм эпĕ сăвă-юрă

Хирти чечек пек суйласа.

Вăл ĕмĕр-ĕмĕр сывă пулĕ.

Ăна тытатăп уяса.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн