Ачалăха таврăнни

Шурă пĕлĕт çине-ши ларса ăсанать,

Манăçми шух ачалăх ирĕ.

Тетте–крепость хули пушанать,

Пире мар — ыттине кĕтсе илĕ.

Ав вăрман, укăлча та мăн çул,

Хир сăпки, тăрисен шăнкăравĕ.

Хамăр пухнă яка та вĕт чул,

Вĕтĕр-шакăр ача янăравĕ…

Аслă улăх пире илĕртетчĕ,

Хăй еннех тек туртатчĕ вăрман.

Каçченех çуйхашу илтĕнетчĕ —

Вĕтĕ халăх нихçан та ырман.

…Вăйă-кулă сăртне таврăнсассăн,

Тинкерсе эп сăнап таврана.

Темшĕн-темшĕн сывлатăп пит ассăн:

Тек ачалăх нихçан таврăнмасть.

Çĕнĕ комментари хуш