Савăнать чун-чĕре

Пĕр кавир-самолет

Туянас хам валли —

Юмахри паттăр пек

Сывлăшра вĕçмелли.

Кăн-кăвак тӳпере

Эп вĕçем ярăнса,

Чунăм савнă çĕре

Тинкерем савăнса.

Сарлака уй-хирсем,

Ешерен вăрмансем,

Питĕ пĕчĕк çуртсем,

Кăткă евĕр çынсем.

Вĕлтĕр-вĕлтĕр вĕçет

Ман кавир-самолет,

Çĕршыва курнăçем

Чун-чĕре хĕпĕртет.

Çӳл тусем хушшинче

Çип пекех çырмисем,

Тӳп-тӳрех çул çинче

Машинсем, машинсем.

Эх, илемлĕ тĕнче

Тӳперен сăнама,

Пурпĕрех çĕр çинче

Лайăхрах пек мана.

Çĕнĕ комментари хуш