Электронлă вулавăш

Пӳлер, Пӳлерĕм, вăйăм та хăватăм,

Хĕрӳлĕхе çулупала чĕртсе,

Пуçа тайса сан умăнта тăратăп

«Сывах-и, хĕрĕм?» – теессе кĕтсе.

Пĕлетĕп-ха, никам та сывлăх сунмĕ,

Никам та ăшшăн сасă парас çук.

Кĕрен чечеклĕ, курăклă вал умĕ

Хускалнăнах туятăп тепĕр чух.

Кунта ман йăх юн тăкнине-и манăп.

Тăшман сăнни кашнин ӳтне кĕрсе,

Çич ĕмĕр витĕр тăрăннă мана та,

Ик енлĕ кĕрешӳ çитсен хĕрсе!

Асаттесем ахлатнине туятăп,

Тин пултараймăп пулăшу пама.

Пĕртен-пĕр тивĕçĕм – тупа тăватăп

Чыспа, чунпа, ĕçпе таса пулма.

Ман йăх нумай тутаннă йӳçĕ эрĕм,

Мĕскĕнлĕхе те нишлĕхе тӳссе.

Çуралнă тăрăхăм, Пӳлер, Пӳлерĕм,

Ыйтатăп каçару пуçа пĕксе.

* * *

Кама-тăр вăрттăн килĕштернĕ,

Кама-тăр уççăн юратман.

Усал шутлисене хӳтернĕ,

Ыр тунине часах манман,

Именчĕклĕ, ытла сăпайлă,

Çын куласран хăра-хăра,

Çапла эп çитĕннĕ хам майлă,

Вăрманлă, лăпкă тăрăхра.

Ачалăхăм – çырла утравĕ,

Шап-шурă Çĕмĕртлĕ тĕнчи.

Ыйтсассăн вырăс-и, тутар-и,

Калаттăм эп: «Пӳлер енчи».

Мăнаçчĕ çав самант ман сăнăм,

Кĕрен витсен те питĕме,

Умра уксах Тимур хăй тăнăн,

Сапатчĕ куçăм хĕлхеме.

Пĕртен-пĕр хурçă сăнă евĕр,

Шăтарасла пăхса илсе,

Эп хатĕрччĕ çич ĕмĕр витĕр,

Ямашкăн çулăмсăр ĕнтсе.

Çапла ман кăмăл тĕрекленнĕ,

Аваллăхăн ятне яман.

...Кама-тăр вăрттăн килĕштернĕ,

Кама-тăр уççăн юратман.