Ман Чăваш Ен

Владимир Андреев | Сăвă | 2011 | 602


Уй-вăрманпа утатăп эп,

Ял-хулара çӳреп.

Пĕр саншăн çеç пурнатăп теп,

Сан ятупа çиçеп.

Ан илĕртĕр мана ютпа,

Çук çак çĕртен хакли:

Ман Чăваш ен, ман чун кунта,

Манпа чăваш чĕлхи.

 

Эп чĕремпе пурнап кунта,

Вĕрет кунта ман юн.

Пĕр саншăн çеç çунса чунпа

Эп ирттеретĕп кун.

Мĕн кĕмĕл, ылтăн! Мĕн укçа! —

Пур чи кирли, хакли.

Ман Чăваш ен, таяп пуçа —

Манра чăваш чĕлхи.

 

Юрлатăп эп уяв пулсан,

Таш пуçласан — ташлап.

Тăшман кĕрсен шăл хăйраса

Шăлне çапса катап.

Ман ĕç — пĕр тĕк çунатунта,

Пĕр сас мал юррунти.

Ман Чăваш ен, ман кун-çулта

Кĕрлет чăваш чĕлхи.

 

2011, пуш, 7

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем