Электронлă вулавăш

Тусать тăман.

Асать çил-тăвăл.

Юрпа хупланнă хирĕ, тăвĕ.

Кашлать вăрман.

Çил тек кумать çырма-вар тăрăх,

Чăштăртатса ларать ват чăрăш.

Эс килтĕн тухрăн, ак, таçтан.

— Салам!.. Аван!.. —

Сăмах пуçартăн, —

Чылай çулсем... Тен виççĕ,тваттă? —

Сана курман.

Нумай-нумай шыв юхрĕ, ахăр,

Сана курмасăр, калаçмасăр.

— Ну-ну, аван!

— Салам! Аван!..

Чупса, пит тăрăх,

Пăлхантарать вĕри хĕм. Шăрăх!

Ну, эп — айван!

Ман чĕрере юратнă сăнă

Хальччен сыхланнă,

Юлнă. Тăнă.

Çук! Эп — манман.

— Аван! Салам!

Чунтан калатăп

Чĕрерине. Çук-çук, суймастăп.

Татах калам:

Эс — ман пĕрремĕш хĕмлĕ туйăм,

Анчах, çаплах пурнатпăр уйрăм.

Тыт ман алла.

— Салам!.. Аван!..

Аллу хыт шăннă...

Апла, сан пурнăç питĕ ăннă?

Пурнан аван?

Мĕн, калаçса кунта тăратпăр?

Ик еннелле каллех каятпăр...

Сыв пул! Ан ман!

Салам! Аван!