Мухмăр

Пит çинчи сухала эп хырмарăм,

Паяна шутласан — ик эрне.

Эрех ĕçрĕм, тумлак çывăрмарăм,

Çиме мантăм каçпа, ирхине.

Çавăнпа пуль пит-куç тĕксĕмленчĕ,

Сысна шăрчĕ пек ӳсрĕ сухал.

Кĕсъере те пушанчĕ ман енчĕк,

Урара çук пĕр чĕптĕм вăй-хал.

Алăсем кăлтăр-кăлтăр чĕтреççĕ,

Тытаймаççĕ вĕсем апата.

Тапать вăйсăррăн мĕскĕн чĕреçĕм,

Тăпăр-тăпăр туса, кăкăрта.

Ах, ухмах эпĕ! Мĕншĕн-ши тытрăм

Пурнăçри пирвайхи черккене?

Хам сисмесĕр чунпа ма-ши хытрăм,

Килĕштертĕм эрех йӳççине!?

Акă, халь мухмăрпа аптăрарăм.

Çынсем, парăрччĕ хуть пĕр черкке!

— Алкоголик! — янрать манăн арăм,

Курсанах килте пуш енчĕке.

Çĕнĕ комментари хуш