Алмуш

Геннадий Юмарт | Сăвă | 1 418


Пăлхар елтĕперĕ куллен

Çапла шухăшларĕ хуллен:

 

«Хаяррăн хăмсарчĕ хасар.

Хырать хырçă-марçă та çар.

 

Çураçрĕ ман икĕ хĕре...

Памастъ пурăнма ирĕкре.

 

Тытать иудей йĕркине.

Тыттарĕ ăна кĕрӳшне.

 

Текех пăхăнмастăп ăна —

Таçти аякри кăк хана.

 

Ман хамăн алри çĕршыва

Çĕклесчĕ васкавлăн шавах.

 

Çыхасчĕ пĕр çирĕп çыхха

Пĕрлешнĕ тăват хутлăха.

 

Пăлхар та сăвар йăхĕсем,

Парс йăхĕ, аскул - ак вĕсем.

 

Калаччăр: «Маттур елтĕпер!

Кунтах лайăхрах тĕпленер».

 

Ан тивтĕр çĕнме Пăлхара

Асар та писер хасара.

 

Кирлех тĕреклетнĕ хула —

Тăшман ан кĕрейтĕр шала.

 

Ăна та пултарĕç ишме.

Пур урăх тĕреклĕ хӳме.

 

Илем те Багдад пиллĕхне,

Кĕрем ун чăн-чăн хӳглĕхне.

 

Вара пире хирĕç хасар

Вăр-вар ярас çук утлă çар.

 

Тивет ун чухне йышăнма

Араб мухтакан ислама.

 

Ун пек япаласăр çĕршыв

Пулаймĕ тĕреклĕ те сыв.

 

Шик пур-ха: хăш-пĕр тăрăна

Тӳр килĕ кĕртмешкĕн ăна.

 

Аскул йăхĕпе хальлĕхе

Тупатпăр эпир пĕр чĕлхе.

 

Тытсан та вăл урăх йăла,

Пурнатпăр унпа хăталла.

 

Акус таптамин çĕрĕме —

Çураçрăм ăна хĕрĕме.

 

Пăртас, пушкăрт, çармăс пире

Тивмеççĕ текех чикĕре.

 

Анчах ирĕк чунлă сăвар

Ислам йышăнаймĕ вăр-вар.

 

Хăрушлăх çитсессăн ума

Ниçта пултараймĕ кайма...

 

Çак ĕмĕтĕм тухĕ тӳрре.

Ахаль-и тĕллентĕм пĕрре:

 

Тăратăп кермен тăрринче,

Итлет мана петĕм тĕнче...

 

Эй, Турă, эппин, пиллесем:

Çитейччĕр айван ĕмĕтсем.

 

Шур Атăл Пăлхарĕ вара

Чыс илтĕр йĕри-таврара».

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: