Шухăшламăп

Александр Аслут | Сăвă | 1992 | 580


Çын пурнăçĕ хутлам чаршав пек,

Тĕтреллĕ, çумăрлă кун пек.

Килет çурхи янравлăн, шавлăн,

Каять кăра кĕр сăнĕпе.

 

Пулнах ун ихрешке илемĕ,

Çиçнех хĕмленнĕ ĕмĕтсем.

Пуçа ухса çӳренĕçемĕн

Сасартăк сĕмлĕхе кĕрен.

 

Шăпа мана куçран тĕллерĕ

Пĕр шеллемесĕр, хăратса:

Эс, имĕш, пурăнма пĕлмерĕн,

Юласшăн пултăн тап-таса.

 

Анчах кун аллинчен тараймăн,

Çултан иртеймĕн пăрăнса.

Тепре самант та пурăнаймăн

Пурне те тĕрĕс ăнланса...

 

Каллех — чаршав. Тĕнче хутламĕ.

Каллех — тĕтре. Йĕпху те пăр.

Ыран мĕн пулĕ — шухăшламăп.

Мехел çитсессĕн курăпăр.

 

Нарăс, 1992.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем