Электронлă вулавăш

Пушкин пĕлнĕ чăваша — чунĕпеле йăваша.

Ăна чĕннĕ Ĕрĕмпур, çул кайма сăлтавĕ пур.

Курнă чăваша ялта, вăрăм инçетри çулта.

Хура пӳрт, синкер шăпа — тап-таса чунпа-сăнпа.

Шурă çӳç, шап-шур сухал, калаçать çынпа сахал.

Кил-çурт тăвăр, хĕсĕк çĕр, нуши пысăк виçесĕр.

Шел ыр чунлă стариме, хăçан тухĕ ирĕке?

Тутлă симлĕ пыл-сăри, çепĕç ун сăвви-юрри.

Хурлă çемĕ... Çын хуйхи, пур унта аки-сухи —

Йăлт тĕрленнĕ çемĕре асăнмалăх ĕмĕре.

Халăх чĕлхи — чăн ахах, ялтăрать тăлмачсăрах.

Тĕрĕс, йăлт ăнланмалла — акă мĕнле япала!

Ял легендăпа пуян, эс çакна тӳрех туян.

Илтнине çырать поэт, кирлĕ пулĕ — кам пĕлет.

Курăсăн: майра-патша хĕссе лартнă чăваша.

Хырçă-марçă, куланай — йăлт тирне сĕвет пĕрмай.

Килсе çитнĕ Пăкачав, çĕклесе, хум пек, шăв-шав.

Чăваш шаннă чĕререн, тытнă аллине çĕмрен.

Ак сана йăваш чăваш — унпала пит ан тавлаш!

Халăхшăн шыва, вута кĕрсе хирнĕ улпута.

Сĕм çĕрле е кăнтăрла вăл кĕрешнĕ паттăрла.

Такана çинче кайран ишнĕ, çакнăскер мăйран.

Шел-çке паттăр чăваша, шанчăклă тус-юлташа.

Аслă Атăл йăлт пĕлет, паттăра аса илет...

Пур Бичурин Питĕрте, вăл та ӳснĕ ку тĕлте.

Чапĕ ун — Китай таран... Тав, ыр тусăм, пултаран!

Питĕртех — Çуллахи сад, çӳреме унта ансат.

Мĕне тăрать решетки — тĕнчере çук ун пекки.

Авторĕ Егоров Петĕр, вăл чăваш ачи, пĕлетĕр.

Лартса хур çав кĕтрете генипеле пĕр рете!

Пушкин пĕлнĕ чăваша, пултаруллă тус-йыша.

Çитсе курнă та пĕрре, йĕр хăварнă ĕмĕре.

13.03.99.