Салам, уй-хирсем

Кăтра, ем-ешĕл калчаран

Хăпарчĕ хăмăлĕ ырашăн.

Тăван уйра эп ачаран

Тар тăкнă çăкăрлă ыраншăн.

Ку вырăнта эп акнă сĕлĕ,

Лере ӳстернĕ хуратул.

Кунта малтанхи хут пит селĕм

Хунав кăларчĕ юрату.

Çак туйăма эп сивĕтмен.

Ан тив, кăштах халь эпĕ ватă —

Кĕлте çыххи пек çивĕте

Паян та асăмра яватăп.

Сап-сар пуса пек пĕвĕ тăтăр

Ялан ман куçăм умĕнче.

Пăрçа чечекĕ пек шур тутăр

Вăл вĕлкĕштĕр ман çул çинче.

Ăçта çитсен те, каçăн-ирĕн

Куратăп вир те хуратул.

Салам сана, тăван уй-хирĕм,

Салам, пĕрремĕш юрату.

Çĕнĕ комментари хуш