Тимĕрçĕ хĕрĕ

Анатолий Анат | Сăвă | 2 115


Тутăрпа шăлать васкавлăн

Хĕр тарланă кантăка.

Чĕвĕнсе те, кармашса вăл

Тулалла пăхса тăрать.

 

Урампа пĕр васкамасăр,

Пĕр енне кăшт тайăлса,

Туяпа анать Юлмасов

Тукасран Анаткасса.

 

«Унăн орден та пур, теççĕ,

Пур, тет, ум тулли медаль.

Çывăхран ăна курасчĕ», —

Шухăшлать хĕр пăхнă май.

 

«Кăшт кăна-çке курса юлтăм.

Иртсе кайрĕ. Уксахлать.

Хăй çапах утать хăюллăн», —

Тимĕрç-хĕр пăхса юлать.

 

* * *

Кунĕ ăшă. Уççăн-уççăн

Йăпшăнса шух çил вĕрет,

Пĕр хутламсăр кăвак пурçăн

Каркаланнă тӳпере.

 

Ялкăшать хĕвел. Илемлĕ

Хăйне майлă хĕл тĕнчи...

Ачасем сăрта иленнĕ,

Ярăнаççĕ катаччи.

 

Сарăлса ларать мăнаçлăн

Ват йăмраллă тăван ял.

Ак пĕве. Ав тимĕрç лаçĕ,

Вут сикет унта йăлт-ялт.

 

— Ĕçлеме вăй патăр, — терĕ

Лаççалла кĕрсе Иван.

— Тавтапуç, — тет тимĕрç хĕрĕ, —

Ĕç ăнса пырать, аван.

 

Хĕр хаваслă. Янкăр çутă

Унăн хăмăр куçĕнче.

Вăл кулать. Ик пĕчĕк путăк

Пăч путать ун питĕнче.

 

Тĕлĕнет Иван: анчахчĕ

Çак тĕреклĕ чипер хĕр

Пĕчĕк йăмăкчĕ, ачаччĕ,

Пăрчăкан пек хӳхĕмскер.

 

Халĕ кур, епле вăл харсăр!

Фронтри ашшĕ вырăнне

Пĕр иккĕленсе тăмасăр

Тытнă тимĕрçĕ ĕçне.

 

— Тавтапуç сана, тус-йăмăк,

Çовет Çарĕ ячĕпе! —

Йĕкĕтĕн алли пĕр чăмăр

Пулчĕ хĕрĕн аллипе.

 

Хĕр питне кĕрен тĕс çапрĕ,

Кăшт вăтанчĕ пулмалла.

Вучаха хĕр кăмрăк сапрĕ,

Тытрĕ мăлатук алла.

 

Хĕрнĕ тимĕр йăл çиçтерчĕ

Йăлтăр-ялтăр хĕлхемне.

Мăлатук çӳле çĕкленчĕ,

Пăхăрсам тимĕрç хĕрне:

 

Ĕçпе пиçнĕ хул тĕреклĕ,

Çаннине чавса таран

Тавăрса сатур ĕçлет хĕр.

Ĕçĕ вĕресе тăрать.

 

— Хам шаккам-и, — терĕ каччă,

Хыврĕ вăрăм шинельне.

— Сана, тусăм, пулăшам эп,

Хутшăнам колхоз ĕçне.

 

— Пултарайăн-и? — шанмаслăн

Тимĕрç ыйтрĕ Иванран.

— Халиччен Иван Юлмасов

Пĕр ĕçрен те хăраман.

 

Тухса ӳкмĕ тетĕп ĕнтĕ

Ĕçĕм халь те алăран. —

Кӳренме Иван пикенчĕ,

Хĕр шанманнине кура.

 

Хĕр кулать: «Эппин, ыр каччă.

Пĕр кăтарт ăсталăхна.

Йĕкете кувалда пачĕ, —

Çапса пар-ха ак çакна».

 

Тимĕре каччи çапать те,

Сирпĕнет хĕлхем чăл-пар!

Хĕскĕч тытнă тимĕрç Катя,

«Хытăрах, тет, тепĕр пар!»

 

Иртрĕ кăнтăр. Тимĕр шавĕ

Чарăнмарĕ пурпĕрех.

Ĕçлеме хĕрпе пит савăк,

Тимĕр пек хĕрет чĕре.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: