Сăмах - Сăвă - Чĕлхе

Сăмах - Сăвă - Чĕлхе - Халăх

... Çитмест тесе шутлаттăм чăтăм:

Çыртса-авса хуçлатрĕ хăтăм¹.

Кĕтменччĕ кун пекки хамран,

Ирттертĕм кун, аран-аран

Пусса кăлартăм çав-çавах

Ăшран-вартан çавра Сăмах.

Талас тĕлнех çитсессĕн тĕртĕм²

Вилесчĕ — пĕттĕр, — терĕм, — тертĕм.

Ылхан та савнăç тĕввине —

Хальччен асаплăн йăтнине —

Чăнах, хавасчĕ ӳкерме...

Çуралчĕ... Сăвă-кипкере.

... Мана хама хăварнă Халăх

Мая³ тĕлне, йыша хушмалăх:

Ӳссе çитсен, сарсан çунат

— Пилленĕ пек çӳлти хăват —

Вĕрсе кĕртме черетлĕ чĕм⁴

Сана савса, тăван Чĕлхем.

¹ хăтăм – тытса лартни
² тĕртĕм – мышцасем
³ мая – йăвара хăваракан çăмарта
⁴ чĕм – çĕнĕ пурнăç