Йĕри-тавра илемлĕ çут тĕнче:
Пин-пин çĕн çулçă туратсем çинче
Вĕлтĕртетсе лараççĕ йĕркипе —
Кашни туратăн ешĕл çĕн кĕпе.
Эп тĕлĕнсе тăратăп пĕр самант —
Уçланкăра та пур-мĕн асамат;
Чечексемпе тĕреннĕ пек тĕнче,
Пуçа ухса лараççĕ çил çинче.
Уяр тӳпе пек сеп-сенкеррисем,
Хĕвел пек саррисем, хĕп-хĕрлисем.
Шур лĕпĕшсем вĕçеççĕ çаврăнса,
Канаççĕ чечексем çине ларса.
Çӳл тӳперен хĕвел кулса хĕртет,
Ĕçчен пыл хурчĕ савăнса сĕрлет,
Çĕмĕртлĕхре сар кайăк кĕвĕлет,
Пуриншĕн те мухтать çут хĕвеле!