Çĕнтерӳ анчах илем-мĕн...

Çĕнтерӳ анчах илем-мĕн,

Чăнлăх çех хавас парать!

Ман умра çĕклем-çĕклемĕн

Ĕçлĕ пурнăç хăпарать.

Аслати пек çирĕп сасă

Çуралать кунта тепре.

Урамра çӳрет хавассăн

Ытлашши хастар апрель.

Каç пулсассăн кичем уйăх

Курăнмашкăн именет;

Ушкăнти вĕçĕмсĕр юрă

Утать Атăл хĕррине.

Йыхрав евĕр ман сăвва та

Çамрăклăх чĕнет тула,

Эп куратăп, эп саватăп

Паянхи вăййа-кулла.

Комсомол, мана чĕнеттĕн

Ăмăртмашкăн пĕрмаях,

Эс çĕнтертĕн, эс çĕнтертĕн, —

Эп епле юлам кая?

Пултарас тăк ĕçлемешкĕн —

Юрлама та пултарам.

Çĕршыва ăнса ӳсмешкĕн

Пулăшам вăй пур таран.

Çĕнĕ комментари хуш