Электронлă вулавăш

— Марине, пепкем, выçрăн пуль, ларса çи хăвăртрах, — тет амăшĕ урамра вăрах выляса çӳрене хĕрачине.

— Хам выçман та, хырăм питĕ хытă выçнă манăн. Анне, çитер-ха, часрах. Атту йĕрет вăл.

 

* * *

Маринепе амăшĕ пахча çумлаççĕ.

— Хĕрĕм, тимлĕ пул. Йăрансене таса çумла, — вĕрентет амăшĕ.

Тăрăшать Марине. Пуç çĕклеми ĕçлет.

— Аннеçĕм, кур-ха, епле таса манăн йăран: санăннинчен те тасарах, — тет вăл, çап-çара юлнă хăяр йăранĕ енне аллипе тăсса кăтартса.

 

* * *

Маринесем патĕнче хăнасем.

— Юрласшăн та марччĕ эп, ташласшăн та марччĕ эп, — такмак каласа ташлать кӳршĕри Маюк аппа.

— Ай, суять! Епле суять! — тет кĕтесре курса тăракан Марине. — Ташласшăн марччĕ, тет. Хăй купăса тăсса яричченех тăпăртатма тытăнчĕ.

 

* * *

— Аннеçĕм, итле-ха, сăвă çыртăм, — тет хаваслă Марине.

 

Эпĕ аннене юрататăп.

Юрататăп эпĕ аннене.

Аннене юрататăп эпĕ,

Питĕ юрататăп ăна!

 

— Поэт иккен манăн чĕкеçĕм, — тĕлĕнет амăшĕ.

— «Поет» тени юрлать тени пулать-çке. Эпĕ вара сăвă вулатăп, — ăнлантарать Марине.

 

* * *

— Ыйхăран тутли тата мĕнех пур-ши? — пуплешет Марине ашшĕ, ыйхинчен вăранса.

— Аттеçĕм, питĕ пылак-и вара ыйхи? Мана валли те кăштах хăвар-ха тепрехинче, — тилмĕрсе пăхать Марине.

 

* * *

— Ай, чĕпĕтет! Ай, чĕпĕтет! — аллисене сăтăркалать хĕллехи урамран васкаса кĕнĕ ашшĕ.

— Кам чĕпĕтрĕ сана, атте?! Эсĕ ăна хăйне хытăрах чĕпĕтмеллеччĕ! — шеллет ашшĕне Марине.

 

* * *

— Вĕлтĕрен кайăкĕ вал, — тет такам çинчен асламăшĕ Марине амăшĕпе калаçнă чух.

— Асанне, вĕлтĕрен кайăкĕ тени мĕн тени пулать? — кăсăкланать Марине.

— Вĕлтĕрен хушшинче тупнă тени пулать, — тет, нимĕн калама аптранă асламăшĕ.

— Эх, шел! Епле вилсе кайман вăл унта?! Вĕлтĕрен питĕ хытă чĕпĕтет-çке?

 

* * *

— Эпĕ «Çитмĕл те çиччĕ» передачăна питĕ юрататăп, — тет Марине амăшĕ. — Татьяна Ильина та питĕ килĕшет мана.

— Ай-уй, аннеçĕм! Питĕ нумай передача юрататăн-çке эсĕ? — тĕлĕнет Марине. — Эпĕ иккĕшне анчах юрататăп: «Сармантей» ятлине тата ертӳçине — Галя аппана.

 

* * *

Марине «Çилçунат» ятлă журнал пăхса ларать. «Ырвалюк» ятлă страница патне çитсен, тĕлĕнсе калаçать:

— Ырвалюк, Ырвалюк! Тен, Валюкĕ ырах та мар пуль. Ав, пирĕнпе садике çӳрекен Анаткасри Валюк пĕртте ырă мар. Яланах мана çивĕтрен туртать. «Ыранюк» тесен лайăхрах пулмалла. Кӳршĕ Анюк манпа нихăçан та çапăçмасть.

 

* * *

— Вылямастăп санпа урăх. Эсĕ манăн пӳскене шăтаратăн, — тет Анюк, куççульне вараланнă аллипе шăлса.

— Уншăн эпĕ айăплă мар-çке, — тет Марине, турре тухма тăрăшса. — Уншăн лавккаç айăплă. Вăл сана час шăтакан пӳске сутнă.

 

* * *

Марине, тутлă ыйхăран вăраннăскер, амăшне шыраса кухньăна кĕрет.

— Аннеçĕм, мĕн пĕçерсе çитересшĕн эсĕ мана паян? — ачашшăн тĕршĕнет вăл кухньăра тăрмашакан амăшĕ çумне.

— Маннă кĕрпинчен пăтă пĕçерсе парас тетĕп, — савса çупăрлать ăна амăшĕ.

— Çав пăтта Анюк çитĕр,

— Ма тата?

— Маннă кĕрпинчен пĕçернĕ пăтă çисен — манакан пулатăн.

 

* * *

— Упа ятлă хушамат кирлĕ мар мана, — кĕтмен çĕртен каласа хучĕ Марине, куççульне çăтса. — Ман çине упа пусман. Эпĕ юрлама та, ташлама та пĕлетĕп. Кӳршĕ Анюк вара ни юрлама, ни ташлама пĕлмест. Вăл пултăр Упа. Мана урăх хушамат парăр.

 

* * *

Маринепе Анюк пытанмалла выляççĕ. Шырать, шырать Марине Анюка, ниепле те тупаймасть. Чăланти лар хыçĕнче ларса ывăннă Анюк текех чăтаймарĕ:

— Эпĕ Африкăра! Хам таврăнмасăр та тупаймастăн эсĕ мана! — тесе кăшкăрчĕ. Тавçăруллă Марине пит нумай шухăшласа тăмарĕ:

— Банан илсе кил-ха мана валли нӳмайрах, Эпĕ ăна пĕртте çисе курман, — терĕ.

 

* * *

Марине аппăшĕ пăхмасăр сăвă калама вĕренет.

— Тухса кайрĕ вăрмана хăрăк-турат пуçтарма, — вулать вăл хытă сасăпа.

— Эй, айванскер! — тарăхать Марине. «Хăрăк-туратран мĕн ăшши пултăр!

 

* * *

— Улми йывăççинчен аякка ӳкмест, — калаçаççĕ Марине амăшĕпе асламăшĕ тем çинчен.

— Ӳкмест тет иккен! — хирĕçлет урайĕнче пуканепе вылякан Марине.

— Ĕнер, ав, вăйлă çил пулчĕ те, пирĕн улмуççи çинчи панулмисем кӳршĕсен пахчине çитиех ӳкнĕ. Анюк савăнсах пуçтарчĕ.

 

* * *

— Эх, çав Маюкăн чĕлхи! Ытла та çивĕч-çке! — те хурлать, те мухтать кӳршĕ хĕрарăмне асламăшĕ.

— Хăйрать пуль вăл ăна. Леçсе пар çĕçĕсене Маюк аппана, хăйраса патăр. Атту тек аттене ятлатăн хăйраманшăн.

 

* * *

Радиора илемлĕ юрă янăрать.

— Шăратаççĕ çепĕç юрăсем кимĕ çинчи çамрăк хĕрĕсем, — тесе юрлаççĕ Шупашкар артисчĕсем.

— Анне, анне, кимĕ çинче газ плити пур-и вара юрăсене шăратма? —тĕлĕнсе ыйтать Марине.

 

* * *

Марине варĕ ыратнипе аптăранă.

— Ачам, ачам! Кам харăс темиçе çăмарта çисе ярать! — ятлаçать амăшĕ, пепкине эмел ĕçтернĕ май.

— Ара, аннеçĕм, хăвах калатăн-çке хăвăртрах ӳсес тесен, нумай çимелле тесе.

 

* * *

— Чăн-чăн пиçмен пашалу, çав çăмăл сăвва та пăхмасăр калама вĕренеймен, — каласа парать такам çинчен амăшне Марине аппăшĕ.

Марине, калаçăва кăштах илтсе юлнăскер, чупса пычĕ те:

— Анне халь анчах кăмака хутса пĕтерчĕ. Пиçмен пулсан, ларт пашалуне хăвăртрах кăмакана, — терĕ.

 

* * *

— Пĕтрĕ пуç! Пĕтрĕ пуç! — аллисемпе хăлаçланать урамран васкаса кĕнĕ Марине асламăшĕ.

— Анне, мĕн пулчĕ? Мĕн пирки çавтериех кулянатăн? — шикленсе ыйтать ывăлĕ.

— Ара, мăйăр пысăкăш пăр çăвать те çӳлтен, пĕтĕм пахча-çимĕçе, тыр-пула пĕтерет-çке.

Марине, çакна илтнĕскер, асламăшне вĕрентет:

— Пĕтрĕ пуç тесе каламалла мар. Пуçу чылаях-çке? Пĕтрĕ пакча-çимĕç, пĕтрĕ тыр-пул, темелле.

 

* * *

— Мĕн çитмест-ши пирĕн пурнăçра? — юрлать Марине амăшĕ, апат пĕçернĕ май.

— Шăкалатт çитмест мана пурнăçра-а-а! «Барби» ятлă пукане çитме-е-е-ест, — хăйне евĕр кĕвĕпе шăрантарать урайĕнче пуканепе выляса ларакан Марине.

 

* * *

— Пăкки тухсах ӳкнĕ пуль тӳпен, тăкать те тăкать сивĕ çумăрне, — ассăн сывлать Марине амăшĕ.

— Асанне, ыйт Турăран, тӳпе пăккине каялла чиксе хутăр, — вĕрентет Марине асламăшне.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн