Электронлă вулавăш

Вăхăт каçалана сулăнсан, вутă пуленкки пек пуклак шăм-шаклă Каптăркка Кавĕрли хăнасем чĕнме тухса кайрĕ. Чи малтан тӳрĕ урамра пурăнакан пуçани патне кĕчĕ.

— Çапла, пуçана! Кĕçĕр сирĕн пирĕн пата хăнана пымалла, — алă парса хыпарларĕ вăл.

— Мĕн тивлетпе? — юри пĕлмĕше печĕ мăк сухаллă пуçанăшĕ.

— Карчăкпа мăшăрланнăранпа вăтăр çул çитнине палăртас терĕмĕр. Как-никак та, хамăр та аллă урлă каçрăмăр.

— Аплаччĕ-çке. Илтнĕ-ха ку хыпара. Ман карчăк та кăштах хатĕрленкелерĕ пулмалла. Мĕн-и, ăшăтса парам мар-и пĕр курка?

— Халех... мĕн-ха... кирлĕ мар пуль, — пĕр вырăнта пускаласа тăчĕ Кавĕрле.

— Пĕр курка çеç, пуçана. Тутине астивмелĕх.

— Эппин, апла, пĕрер курка парса- пăхатăн-и...

Кăрчамине ăшăтсан, пуçанасем ăна пĕрер мар, икшер курка шаклаттарчĕç.

— Хă, каптăркка, аван та пулчĕ пулас ку, — тути-çăварне шăлкаларĕ Кавĕрле. — Ну, пырăр вара, пуçана! Тепре чĕнмелле ан тăвăр. Икĕ эрне ытла хатĕрлентĕмĕр те...

— Çитетпĕр, çитетпĕр.

Пуçани патĕнчен тухсан, кукăр касри вăртахĕ патне çитрĕ Кавĕрле. Лешсем вăл пырсан савăнса ӳкрĕç.

— Аван, аван. Ăна палăртасах пулать. Парнесем те туянса хунăччĕ-ха, — куçран чеен тĕллесе пăхрĕ вăртахĕ. — Ятарласа лавккара эрех илтĕм. Пĕр черкке сыпса пăхмăн-и? Чĕнсе çӳреме хаваслăрах пулĕ.

— Пĕр черкке-и? Сыпса пăхас-ши вара?

— Уй, çав нумай-им вăл? Кил, лар.

Каллех пĕр черкке мар, иккĕ-виççĕ лекрĕ.

— Хă, каптăркка, капла эпĕ хам хăна пулса çӳретĕп-çке, — тесе, Кавĕрле вăртахĕ патĕнчен çăмăллăн тухса утрĕ. Кайри урамри кумĕ патне çул тытрĕ.

— Эсир пирĕн пĕртен пĕр кумсем, Тарье хĕрĕмĕрĕн хреснашшĕпе хреснамăшĕ. Пымаллах! Эсир те пымасан, эй, вара, каптăркка, пирĕн хатĕрленни кăлăхах пулать.

— Пыратпăр, ара, пыратпăр. Ятарласа сăра турăмăр пулать те. Пыл ярса йӳçĕтрĕмĕр. Парса пăхам-и?

— Ахтур, пыл ярсах чăрмантăр-и?

— Чим-ха, чим, ура уттилĕх ĕçсе пăх. Киле çитнĕ çĕре шăпах çăмăлланăн...

Ялти вунă киле кĕрсе кашнинчех çакăн пек, тутине астивмелĕх те ура уттилĕх е çӳреме хаваслăрах пулĕ тесе, хăналанса тӳхрĕ Кавĕрле.

Ĕнтĕ вăл, акă, киле таврăнать.

— Э-э, Каптăркка Кавĕрли. Таçта тупнă ĕнтĕ, — йăл-л кулса иртеççĕ тĕл пулакансем.

Акă вăл, енчен енне сулкаланса, армак-чармаккăн танкăшкаласа пычĕ те хăяккăн шаплатса ӳкрĕ. Аран-аран йăраланса тăрса, сăмса айĕн мăкăртатрĕ:

— Хă, каптăркка! Ĕçрĕн пулсан, чăт. Ӳкнĕ çĕрте ан вырт.

Çакăн пек темиçе хут ӳке-ӳке тăрса, тепĕр çĕрте упалене-уналене, каç пулас умĕн хăй килĕ умне çитрĕ. Кăшкăрса ячĕ:

— Тарье пур-и, Марье пур-и?!

Нумайччен урлă-пирлĕ хыпашласа тăрса калинкке уçрĕ, килкартишне кĕрсе тăчĕ.

— Тарье пур-и Марье пур-и?! — кăшкăрчĕ татах.

Ăна кĕтсе илекен, алăк уçса кĕртекен никам та пулмарĕ. Пӳртре арăмĕ ларать.

— Ах, Кавĕрле, мĕн турăн? Мĕн турăн? — яштах сиксе тăчĕ вăл. — Ăçта капла кӳпсе килтĕн? Чипер чĕнсе çӳре тесе ятăм вĕт сана!

Кавĕрле ун патне тайкаланса пычĕ.

— Ан янра! Ăçта сăра? Тавай, сăра пар?

— Сăра тата сана. Салатне хам турăм. Хам авăртрăм. Сăрине хам вĕретрĕм, çирĕм витреллĕ пичкене тултартăм. Эсĕ таçта шабашникре сĕтĕрĕнсе çӳрерĕн.

— Пар, тетĕп сана!

— Памастăп. Хăнусене мĕнпе пăхса ярас тетĕн? Вĕсене чĕнме пĕлтĕн-и хуть? Хам ухмах çав, хамăн каймаллаччĕ.

— Эй, çав нĕрккерен ыйтса тăрап-и çак? — Кавĕрле сиксе тăчĕ. — Ĕçе-еп! Пĕрех ĕçеп!

Шыв курки ярса илчĕ, сакай алăкне уçрĕ, сăра ăсма анса кайрĕ.

— Мĕн тăван? Пичке пуçлас тетĕн-и? Кам хушнă? Тулли пичкене хăнасемпе пĕрле пуçлаççĕ ăна. Эп сана, чим-ха...

Кавĕрле хыççăн арăмĕ те сакайне сикрĕ. Тытăçса ӳкрĕç. Тĕрмешнĕ хушăра пичке пăккине хуçса нăрахрĕç, ăна хăйсем сисмерĕç.

Пичкери сăра сакай тĕпне кӳлленсен тин иккĕшĕ те тăна кĕчĕç.

— Мĕн турăмăр? Мĕн турăмăр? — тĕттĕм çĕрте кăлин-калин пăхкаларĕç пĕр-пĕрне.