Пирвайхи юрату :: Иккĕмĕш пайĕ

Тем тĕрлĕ те шухăшласа пăхрăм, шухăш вĕçне ниепле те тухаймарăм. Çавах та ытлашшиех хуйхăрмарăм. Мĕншĕн кулянас, Ирина каçарчĕ вĕт мана! Çĕнĕ районта лайăхрах ĕçлеме тăрăшмалла кăна, вара унпа курнăçма та çăмăлрах пулĕ!

Иринăна илсен, эпĕ ăна нихăçан та кӳрентерĕссĕм çук ĕнтĕ. Кӳрентермĕттĕм те, ĕмĕтре кăна тăрса юлмĕ-ши шутлани? «Пурнăç — ĕмĕтрен вайлăрах», тесе Ирина хăй каласа хунăччĕ вĕт-хă пĕрреччен...

Мĕншĕн апла каларĕ-ши?