Юпа уйӑхне кӗтӗмӗр, ҫанталӑк та сивӗтрӗ. Хваттерсенчи пӑрӑхсем вара халӗ те вӗри мар, сип-сивӗ. Ҫавна май пӳлӗмсенче те шӑнса вилмелле. Ҫынсем ӑшӑ парасса чӑтӑмсӑррӑн кӗтеҫҫӗ. Хӑшӗ-пӗрисене юпан 1-мӗшӗнчех панӑ-ха. Теприсем вара шӑл шаккаса халӗ те кӗтсе лараҫҫӗ.

Чӑннипе, кӑҫалтан пуҫласа ӑшӑ хӑҫан парассине регионсем хӑйсем палӑртассине илтсен савӑннӑччӗ те. Ара, ытти ҫулхи пек шӑнмастпӑр тесе шутланӑччӗ. Кӑҫалтан урамра 7 градус виҫӗ кун тӑрасса та кӗтмелле мар тенӗччӗ. Анчах шанни харама кайрӗ. Тӗнче тетелӗнчи ҫӑлкуҫсене ӗненес тӗк, юпан 5-мӗшӗ тӗлне Шупашкарта 71 котельнӑйӗнчен 32-шӗ ҫеҫ ӗҫлеме пуҫланӑ.

Тен, тӗрӗс мар та калатӑп пулӗ, анчах управляющи компанийсем урамра сивӗтессе кӗтсе лараҫҫӗ, шӑнтсан ҫеҫ вӑранаҫҫӗ. Пирӗн республикӑра ӑшӑ ярас ӗҫ питӗ «кӑткӑс» пек туйӑнать.

Паллӑ ӗнтӗ: чи малтанах ача пахчисемпе шкулсене ӑшӑтма тытӑнаҫҫӗ. Юпан 5-мӗшӗ тӗлне хулари 127 ача пахчинчен 124-шне ӑшӑтма тытӑннӑ. Эппин, виҫҫӗшӗнче ачасем шӑнаҫҫӗ. Шкулсене те пурне те ӑшӑ парса ҫитереймен. Хӑш-пӗр пульницӑсенчи пациентсем те ӑшӑра выртаймаҫҫӗ.

Нумай хваттерлӗ 1792 ҫуртран 160-шне ҫеҫ ӑшӑтма тытӑннӑ. Ку 9 процентпа кӑна танлашать. Хальлӗхе палӑртнӑ тӑрӑх, ҫуртсене юпа уйӑхӗн 8-мӗшӗччен ӑшӑ пама палӑртнӑ.

Юрать, кӑҫал ҫанталӑкӗ авӑн уйӑхӗнче лайӑх тӑчӗ. Унсӑрӑн чылай вӑхӑт шӑнма тиветчӗ-ши?