Суздаль хулинчи пĕр ахаль кăна çурт вилла ятне... йытта пула тивĕçнĕ. Унтан та ытларах - йытăллă пÿрт туристсене чи килĕшекен хăна çурчĕсен йышне кĕнĕ.

40 миллион турист хаклавĕ тăрăх йĕркеленĕ The Booking’s Best Awards текен танлашăма пирĕн çĕршыври виçĕ хостел лекнĕ. 26 категорипе палăртакан танлашăмра тĕнчери чи лайăх хăна çурчĕсенчен пуçласа алшăллинчен хатĕрленĕ оригами таранах хак панă.

Асăннă танлашăмра Раççейĕн туриндустрийĕ икĕ номинацире кăна палăрнă. Çапах та тĕнчери чи лайăх 10 хостелтен виççĕшне пирĕн патрисем йышăннине палăртма кăмăллă. Кунта Волгоградри Scotch Hostel пĕрремĕш вырăн йышăннă. Санкт-Петербургри «1912» тата Soul Kitchen ятлисем – çиччĕмĕшпе тăххăрмĕш вырăнсенче.

Суздальте «Башня патĕнче» хăна çурчĕ кĕтмен çĕртен лайăххисен шутне лекнĕ иккен. Унта каннисем ăна 9,7 балпа хакланă. Ку вăл – чи пысăк 10 балтан. Çавна май вăл «Виллăсем» категорире тăххăрмĕш вырăн йышăннă. Анчах Суздальти уйрăм çын çурчĕ нимле вилла та мар иккен, ахаль пÿрт кăна. Туристсене ку çурта сыхлакан йытă уйрăмах килĕшнĕ-мĕн. Çавна пула çурт танлашăмра пысăк хаклава тивĕçнĕ пуль теççĕ.