Пуҫра капланнӑ шухӑшӑм-кӑмӑлсӑрланӑвӑма, вӗчӗрхенӗвӗм-тарӑхӑвӑма хут ҫине куҫармалла-ши тесе ӗнертенпе пуҫ вататтӑм. Паян ҫак сайта кӗрсен Аҫтахар Плотниковӑн «Мы нищеброды что ли?» статйине вуласа тухсан аллӑм клавиатура патне ирӗксӗрех туртӑнчӗ.

Анчах эпӗ — кӑшт урӑххи пирки. Пуяннисем хӑйсен мулӗпе мухтанни-каппайланни-курнӑҫланни-пуҫ каҫӑртни ҫинчен мар. Э-э, чим-ха, мухтанни-каппайланни-курнӑҫланни-пуҫ каҫӑртни пиркиех. Анчах укҫапа кӑна мар, вырӑссем пиллӗкмӗш точка текен вырӑн ҫемҫе вырӑн (тавталогишӗн каҫару ыйтатӑп) йышӑннипе сӑмса каҫӑртни ҫинчен. Унтан та ытларах — хайхи пиллӗкмӗш точка ҫемҫе вырӑнсӑр юласран шикленнипе теприсен, тата ҫӳллӗрех картлашка ҫинче ларакансен, пиллӗкмӗш точкине татти-сыпписӗр ҫуллама тӑрӑшни пирки. Ҫавӑншӑнах ун йышшисем информатор пулса тӑма та хатӗр. Кашни организацирех пур теҫҫӗ-ха ун пек ҫынсем.

Ҫемҫе вырӑнсӑр юласран шикленекен ҫынсем, тӗрӗссипе, тӗлӗнсе каймалла нишлӗ. Анчах хӑйсенче пур ҫак кӑлтӑка вӗсем те асӑрхамаҫҫӗ, те ырӑ япаланах туйӑнать-ши?

Мӗскӗнлӗх пирки калаҫу пуҫартӑм та темиҫе ҫул каялла илтнӗ пӗр тӗслӗх асӑма килчӗ. Сумлӑ пӗр организацире тӑрӑшакан ӑслӑ-тӑнлӑ ӗҫченех пуҫлӑхне юрасшӑн парне те йӑтнӑ, комплимент ҫине комплимент та каласа ҫӳренӗ. Анчах нимӗн те пулӑшман: лешӗ пӗрех темле те авса хуҫнӑ. Пӗррехинче тата ҫав этемкке тар тӑкнӑ ҫӗртех ӗҫе тухман пек хут та шӑрҫаланӑ. Мӗскӗне хӗрхеннипе хастартарах ӗҫтешӗсем унпа пӗрле пулса надзор органне хут шӑрҫаланӑ. Анчах лерен тӗрӗслеме килес умӗн хайхине пуҫлӑх «кавир ҫине» чӗнсе илнӗ. «Эпӗ ниҫта та ҫырас темен, мана ӗҫтешӗмсем хистерӗҫ», — касса татнӑ ҫав тӑмана.

Мӗскӗнлӗх, чӑн та, ҫынна тем тума та хистет. Суйма та, йӑпӑлтатма та, хӑйне ҫав самантра кирлӗ ҫын патне парне йӑтма та, теприсене, хӑйне хӳтӗлекен таса чунлисенех сутма та, элек сарса ҫӳреме те. Килӗшмен пулӑмсене ыттисем куҫран пӑхса сӳтсе явнӑ чух мӗскӗн этем ҫӑвара шыв сыпнӑ пек ларать, анчах меллӗ самант тупӑнсанах вӑрттӑн ҫисе-кӑшлама тытӑнать. Хӑй малтан ӳке-ӳке пуҫ ҫапса ҫӳренӗ ҫыннӑн пуҫне лешӗ сиссе юлман чухне чаш кӑна касса кайма та пултарать.

Мӗн тӑвас тетӗн, «Йӑпӑлти пӑру икӗ ӗнене ӗмет, ачаш марри хӑй амӑшне ӗмеймест», — тесе ваттисем ахальтенех каламан-тӑр. Теприсем, тен, ун йышшисене: «Пурӑнма пӗлеҫҫӗ», — тесе ырлаҫҫӗ пулӗ. Кама мӗнле пулӗ те, килӗшмест мана ун пек пӑру. Тем тесен те килӗшмест. Килӗшменнинчен ытла хисеплейместӗп ун пек чӗрчуна.