Электронлă вулавăш

Тĕттĕм асамçă Фалес патнелле утрĕ, туйине кăларчĕ. Фалес ун çине асам хыççăн асам ячĕ, анчах усси пулмарĕ. Юлашкинчен Фалес нимĕн те тăвайманнипе чакма пуçларĕ, юлашки хут ун çине шăнтса лартса ватса пăрахакан асам ячĕ. Асам çутă çине çапăнчĕ, анчах каялла мар, щит тарăх шуса кайса Лордвана пырса лекрĕ. Тĕттĕм асамçă малтанах нимĕн ăнланмасăр тăчĕ, мана çак вĕтĕ асамçах лектерчĕ-ши тесе шухăшласа илчĕ. Анчах унăн пӳрне вĕçĕсем пăрланса ларма пуçласан унăн иккеленӳсем юлмарĕç. Пĕр самантрах чи вăйлă тĕттĕм асамçă Лордван шăнса ларчĕ, шанкăртатса ванса кайрĕ. Çавăнтах тĕттĕммине хупланă çутă та пĕтсе ларчĕ. Лордванăн шĕшкĕ туйи çĕр çине ӳкрĕ те çунса кайрĕ, тĕтĕмне кăна вĕçсе килнĕ çил пĕрле илсе кайрĕ.

Фалес та, тĕттĕмми те ним тăваймасăрах пĕр вăхăт хытса тăчĕç, кайран пĕр-пĕрин çине пăхса илчĕç. Самантран пĕтĕм енчен асамçăсем чупса тухрĕç, пурте — çуттисем. Фалесăн çăварĕ хăех уçăлса кайрĕ. Вăл тепĕр хут тĕттĕмми çине пăхрĕ те туйине ӳкерчĕ. Унăн куçĕ умĕнчех тĕттĕммин куçĕсем йĕркеллĕ тĕс илчĕç, хăмăр тĕслĕ пулса тăчĕç. Фалес çакна курсан тепĕр хут икĕ аяккине пăхса илчĕ те веçех ăнланчĕ. Вăл палланă тĕттĕммисем те çуталнă иккен. Вĕсен хушшинче пуринчен пĕр пуç çӳллĕ ельфсем те, виçĕ пуç кĕске гномсем те пулнă. Пурте ун çине шыв сыпнă пек пăхса тăчĕç, анчах самантран пурте ур-ра! кăшкăрса ячĕç. Унăн патне пурте чупса пычĕс, малтанах Хорунг, кайран Равенпа Сирен, кайран ельфсемпе гномсем тата ыттисем чупса çитрĕç.

Юлашкинчен Фалес умне Флагрис тухса тăчĕ. Унан куçĕнчен куççуль тухнă, вăл Фалес аллине чăмăртарĕ те:

— Эпир тĕттĕммисене хирĕç виçĕ пин çул çапăçатпăр, — терĕ, — эсĕ вара, çирĕм пĕр çулта, анчах чи ватă та вăйлă тĕттĕм асамçăна çĕнтертĕн. Малашне эсĕ Ылтăн туян ушкăнĕнче пулăн, ун çинче пирĕн Кĕмĕл виçкĕтеслĕхе вырнаçтарнă, — терĕ вăл.

Фалеса алă парса, çурăмĕнчен çапса, тав туса пĕтерсен пурте хăлха илтме пăрахмалла кăшкăрса, савăнса, ташласа хавăрт мар вăрмантан тухса кайрĕç, кам лаша çинче, кам çурран уялла, Нерос еннелле кайрĕç.

Виçĕ кунтан çак шăв-шавлă ушкăн Нероса çитрĕ. Кунта вара пысăк уяв турĕç. Фалес уявран шăппăн тухса кайрĕ, лашасем патне утрĕ. Шурçилхе унтах пулнă. Унăн ылтăн урисем çутатса тăнă. Фалес хăйĕн юратнă урхамахĕпе савăнăçлăн тĕл пулчĕ...

Эпилог

Çак çĕнтерӳ историре пысăк йĕр хăварнă пулнă. Çĕнтерӳ кунне «пысăк пĕрлешӳ кунĕ» е «пысăк çĕнтерӳ кунĕ» тенĕ. Çавăнтанпа асамçăсем хушшинче урăх вăрçăсем пулман.

Фалес пĕррехинче Шурçилхене шелленсе салтса яна пулнă, анчах та çывăрма выртсан, каçхине иккĕре вăл мăнаçлă ăйăр ихĕрнипе вăранса каять. Шурçилхе Фалеса питĕ юратнă, çавăнпа каялла таврăннă.

Флагрис малалла та çуттисен пуçлăхĕ пулнă, Фалеса мĕнле каланă, çавăн пекех тунă — ăна Ылтăн туя ушкăнне кĕртнĕ. Çавăнта Фалес нумай вĕреннĕ, нумай çĕнни пĕлнĕ. Кашни кунах Фалес хăйĕн Шурçилхи патне çӳрене, унпа калаçнă.

Пĕррехинче Флагрис темĕнле сăмах шыраса тупнă пулнă. Вăл ăна тĕрĕсленĕ, нимĕн те тупайман та ахалех çырса хунă. Фалес ăна курсан туйине аялла тĕллесе тăрса саспа вуланă та тĕлĕннипе кайсах ӳкнĕ — темĕнле çын çинçе сасси илтĕнсе кайнă. Вăл çĕтел айне пăхнă та каллех йăванса кайнă — шăши калаçнă пулнă мĕн.

Çакăн пек асамçăсем çĕнĕ асам шутласа кăларнă, хăйсен лашисене çын чĕлхипе калаçма вĕрентнĕ, малтанах Шурсилхене.

Çакăн хыççăн Фалес хайĕн Шурçилхине тата хытăрах юратма пуçланă — вăл калаçма та пултарнă вĕт. Çакăн пек, каласакан Нерос лашисем каллех çĕр пичĕ çинче пулнă. Вĕсен патши Шурçилхех пулнă.

Пĕтĕм лашасем калаçма пуçласан, çак тĕлĕнмелле асама пурте манса кайнă, нимĕнле çырнисем те юлман. Тен, турасем е урăх япала Нерос лашисене чĕртесшĕн пулнă, анчах ун пирки нимĕн те паллă мар.

Повеçри юлашки сăмахĕсем

Каласа панă тăрăх, ельфсемпе гномсем çапăçура асамсăсенчен лайăхрах çапăçнă пулнă, вĕсенчен иккĕшĕ, Вакрон гномпа Хилдор ельф Флагриса вилĕмрен çăлнă пулнă, вĕсене çавăншăн Кĕмĕл виçкĕтеслĕхпе усă курса асамçăсем туна пулнă. Вĕсен ачисемпе ачисен ачисем çĕр çинчи пĕрремĕш асамçă — ельфсемпе асамçă — гномсем пулса тăнă. Кун пирки, чăннипех, урăх историнче нимĕн те каламан.