Электронлă вулавăш

Сантали Лариванĕ, пĕрле сыпнă тусĕсемпе сыв пуллашса, тăван ялне тӳрĕ çулпа утрĕ. «Утрĕ» теме аванах та мар-ха, мĕншĕн тесен вăл тайкаланса кăна пычĕ. Хăш чух такăна-такăна кайкаларĕ.

Тӳпери çăлтăрсем те ытти чухнехи пек мар, ытлараххăн курăнчĕç Ларивана. Йă-ăл! çиçсе илеççĕ те çĕр çине вĕçсе анаççĕ. «Телей çĕр çине тăкăнать, — философла пĕтĕмлетрĕ Лариван. — Тен, НЛОсем анаççĕ пирĕн пата? Вăт пĕрре тĕл пуласчĕ çавсене».

Çырпа çырмине çитнĕ чух умра тем амакĕ мĕлтлетни курăнса кайрĕ. Хĕрлĕ сенкер çутăсемпе ялтăрать хăй.

— Хайхи Марс çыннисем мар-ши? — иккĕ-виççĕлле курăнакан куçĕсене сăтăрса илчĕ Лариван. — Чăнах, çавсем пулас. Кур-ха, ку турилккерен тухнă этем-чĕрчунсем те çамки çинчи хунарсемпе йăлтăртаттараççĕ.

Лариван пĕчĕккĕн-пĕчĕккĕн пусса хĕлхем сапакан япала патнелле çывхарчĕ. НЛО çыннисем те ăна асăрхарĕç курăнать.

— Ăçталла çул тытатăн, тăванăм? — Сантали ачине тĕлĕнтерсе чăвашлах ыйтрĕ вĕсенчен пĕри.

— Эпĕ мĕн-ха... Ĕçрен таврăнатăп, хисеплĕ НЛО çыннисем, — такăнакан сасăпа хуравларĕ Лариван.

— О-о, — терĕç лешсем çакна илтсен, — НЛО пирки те эсĕ лайăх пĕлетĕн-çке.

Малалла

Аншарли пăттине ирсерен

Автанпа чăхсене çитерсен,

Ыррине малашне ан кĕтсем;

Пуçтаха çаврăнаççĕ вĕсем.

Ӳсĕрпе чăрсăрланнă автан

Хуçине тапăнать чи малтан.

Инкубатор чăххи самăр та —

Йăвинче курăнмасть çăмарта.

Сурăхсем тĕлĕнеççĕ пăхса,

Йытă та хăнăхман çак шăрша,

Автанран пăрăнать тарăхса,

Çĕрçисем те çĕклеççĕ шăв-шав.

Мĕн усси çавăн пек чăхсенчен?

Кил хуçи кăшт çиесшĕн ĕçсен

Тайкаланчăк айван автана

Чăмтарать чи малтан хурана.

Каскăн çил шурă тĕк вĕçтерет

Паварти хуранта мĕн вĕрет?

Кил хуçи хăналать куршине

Пĕçерсе юлашки чăххине.

Аншарли, аншарли, аншарли...

Чăх-чĕпсемшĕн те вăл чун илли...

Мĕн калассăм килет-и тата?

Ман самахăм та çук, тупата.