Васкакан вакка сикнĕ тенĕ ваттисем. Васкакан водительсем пĕрне-пĕри ирттерме пĕр минут тăхтас килменнипе çуршар сехет вăхăт ирттернине Шупашкарти Пичет çурчĕнчен кунсерен тенĕ пек асăрхатăп. Пÿлĕм чÿречи Иван Яковлев проспекчĕ еннелле тухать те, шăрăха пула яри уçса хунă май урамри шăв-шав шалтинчен вăйлă илтĕнет.

Машинăна хăвăрт чарма хăтланса тормоза хăвăрт пуснă май урапа асфальт тăрăх хăйĕн инерцийĕпе шуса кайнă сасă яланах хăлхана кĕрет. Ĕнер вара кантăк ваннă сасăпа пуçа урам еннелле пăртăм. Инкекĕ яланхиллех ункăра, Иван Яковлев проспекчĕпе Мир проспекчĕ пĕрлешнĕ ункăра пулса иртет. Çав ункăна кĕрен-тухан водительсем пĕрер минут пек тăхтас килменнине пула тепĕр чух çуршар сехет те çухатаççĕ. Çапăннă хыççăн. Ара, урапана страхланă компани элчине кĕтеççĕ-çке. Çул-йĕр инспекторĕсем те пырса ларнине асăрхатăп вара. Ку вăл васканипе çухатнă вăхăт. Тÿррĕн каякан тем ырă мар япала хыпнă тени ĕнтĕ. Унсăр пуçне кайран урапана юсаттарма хăтланса çÿремелле-çке.

Çак кунсенче тата «На-связи» форумра йĕркене вĕçĕм пăсакан водитель пирки сÿтсе яваççĕ. Çынсем хăйсен видеорегистраторĕ çинчен çырса илнĕ видеона та лартнă. Çул-йĕр правилине сĕмсĕррĕн пăсакан çын республикăри предприятисенчен ертÿçи, унăн тăванĕ правăна сыхлакан органсенчен пĕринче ĕçлет тесе ĕнентереççĕ унтисем.

Чăн та, ăçта васкать-ши этем тени? Вилĕм патне хыпăннăнах туйăнать хăш-пĕр водитель руле епле тытса пынине сăнанă май.