Паллах, пур. Сăмахăм - çул укçи пирки. Кÿкеçрен Шупашкара маларах 162-мĕш маршрут кăна турттаратчĕ. Унсăр пуçне Лапсар урлă 153-мĕш автобус тата пушар хуралĕ вырнаçнă тăрăхран 325-мĕш маршрут çÿренине район центрĕнче пурăнакансем пĕлеççĕ ĕнтĕ. 162-мĕш маршрутпа пĕрлех кайран тепĕр маршрут хутлама тытăнчĕ. Вăл 162-мĕш маршрутран хакĕпе уйрăлса тăратчĕ: лешĕ 16 тенкĕпе илсе çÿренĕ чух 10 тенкĕпе, лешĕ 20 тенкĕпе турттарнă чух 15 тенкĕпе илсе çÿретчĕ.

Укçа шутне ирĕксĕртен шутлама тивекен, ĕçе кунсерен Шупашкара çÿрекен çынсемшĕн йÿнĕ маршрут тупăнни питĕ мелли каламасăрах паллă. Икĕ маршрут тупăшса çÿренĕ май юлашки вăхăтра вĕсем хака тата чакарчĕç. Халĕ иккĕшĕ те 10 тенкĕпе турттарма пуçларĕç.

Халĕ Кÿкеç ял тăрăхĕн халăх канашĕ 149С ят панă маршрут саккунпа килĕшÿллĕн çÿременни пирки хыпарлать. Унран 162-мĕшĕ çухатнă услама та суд урлă шыраса илейресси пирки пĕлтерет. 149С маршрута çапах та хупмасса шанма пулать. Енчен те вăл конкурс витĕр тухса хăй маршрутне çирĕплетсен.

Çынсемшĕн, паллах, кирек епле маршрут турттарсан та пĕрех. Вĕсене чи кирли йÿнĕ пултăр тата çитес çĕре вăхăтра çитме май килтĕр.