Чӑваш Республики Раҫҫей Федерацийӗн Европӑри пайӗн варринче, Сӑрпа Сӗве хушшинче вырнаҫнӑ. Хӗвеланӑҫӗнче вӑл Чулхула облаҫӗпе, ҫурҫӗрте Мари Эл, хӗвелтухӑҫӗнче Тутарстан Республикипе чикӗленет, Мордва Республикипе Ульяновск облаҫӗ - кӑнтӑр енчи кӳршисем.

Лаптӑкӑшӗпе пысӑках мар пулин те (Федерацири 89 субъектран 81-мӗш вырӑнта) Чӑваш Республики этем йышӗпе йӑвӑ - 1 тӑваткал ҫухрӑма 74,3 ҫын тивет (йӑвӑлӑх тӗлӗшӗпе 4-мӗш вырӑн). 18 пин тӑваткал ҫухрӑмран кӑшт ытларах лаптӑкӗ ҫинче миллион ҫурӑ ҫын пурӑнать, вӗсенчен 40 процента яхӑн – ялта. Пӗтӗм халӑхӑн 67,8 проценчӗ - Республикӑри титуллӑ наци. Чӑвашсем, халӑх йышӗпе илес пулсан, Раҫҫейре пиллӗкмӗш вырӑнта.

Лаптӑкӗпе пирӗн Чӑваш Республики Европӑри ҫак ҫӗршывсенчен пысӑкрах: Черногори, Люксембург, Андорра, Мальта, Лихтенштейн, Сан-Марино, Монако, Ватикан. Кунсӑр пуҫне Чӑваш Ен Азири нефть сутакан ҫак ҫӗршывсенчен пысӑкрах: Бахрейн, Бруней, Кувейт, Катар… Пирӗн Республика Израильтен, Ливанран, Сингапуртан та пысӑкрах. Ҫурҫӗртен кӑнтӑралла унӑн территорийӗ 190 ҫухрӑма, хӗвеланӑҫӗнчен хӗвелтухӑҫ енелле 160 ҫухрӑма тӑсӑлать.