Sign in | Sign Up | Signing in will enable you to post comments and send messages to the users.
 +5.3 °C
Начитанный болван - самая докучливая разновидность дурака.(Д. Тейлор)
 

Ad

Виталий Станьял: Уксак Якку, Кӑмкан, Валяй Нафуй, Емтип Каҫҫи, Уйташ, Ясарпи тата ыттисем

Виталий Станьял20.12.2017 11:2013332 views

Иван Егоровӑн виҫӗ кӗнекеллӗ «Ҫут тӗнче» романӗ 2004 ҫултах пичетленнӗ-мӗн, анчах эпӗ ӑна халӗ тин тытса вулама пултартӑм. Вуларӑм та, хамӑн шухӑша ҫырсах хурас терӗм.

Иван Егоров (Пурис Иванӗ, 1943 ҫ.ҫ. ячӗ чӑваш литературине Сениэль ячӗпе пӗрле кӗрсе юлчӗ. Михаил Сениэль (1940-2014) поэт — унӑн пиччӗшӗ, илемлӗ сӑмахлӑх ҫулӗпе ертсе пыраканӗ. Вӗсем иккӗшӗ те пурнӑҫа сӑмах хӑватне ӗненсе, ӑна чунпа парӑнса ирттерчӗҫ. Самана пӑтранса кайнӑ хыҫҫӑн та тӑван сӑмахран сивӗнмерӗҫ, выҫӑллӑ-нушаллӑ пурӑнсан та ҫыру ӗҫӗнчен пӑрӑнмарӗҫ. Унтан та ытларах – хысна шалӑвне пӑрахсах, ҫунатлӑ ытарлатури пек каласан, литература анине тимлесе сухаларӗҫ. Канмасӑр сухаларӗҫ, акрӗҫ, ҫимӗҫ ӳстерчӗҫ. Авӑнне те ҫапса кӗртрӗҫ. Михаил Сениэлӗн вырӑсла ҫырнисен суйласа илнӗ пуххи виҫӗ томпа пичетленсе тухрӗ. Чӑвашлисем ку калӑпӑшран та ытларах ҫутӑ курчӗҫ. Пуриссен Иванӗн те пичетленни вунӑ кӗнекерен иртет.

Иван Егоровӑн ҫӗнӗ романӗ – тӑван кил-йышне, пиччӗшне тата вӗсен тавринчи чӑваш литература картине кӑтартакан хӑйне расна хайлав. Ҫемье хроники. Авторӗ ӑна эпопейӑ тенӗ, анчах унта, паллах, эпос анлӑшӗпе витӗмӗ ҫук. Эпӗ хайлавӑн жанр паллине тупаймарӑм: роман-памфлет, роман-пароди е роман-эпитафи (унта вилекен питех нумай) теме пулать. Чӑвашла каласан, тиркевлӑ, виртлешӳллӗ сӑскан (роман). Ҫутӑ тӗнчен тӗксӗм енчи хуппи-хыттине ҫавӑрса пӑхса ҫырнӑ хайлав.

Пӗрремӗш кӗнекен аннотацийӗнче ҫапла каланӑ: «автор чӑваш ялӗнчи пӗр кил-йышӑн сакӑрвун ҫул хушшинчи пурнӑҫӗпе ӗҫне-хӗлне тӗпчесе те сӑнаса савӑнӑҫлах мар пӗтӗмлетӳ патне пырса тухать: малашне те ҫакӑн евӗрлӗ манерпе пурӑнсан-ҫараҫлансан чӑваш урӑх халӑха, манкурта, ҫаврӑнса кайма пултарать е пачах пӗтсе ларать». Ӗҫсем Хырӗшни ялӗнчи Шур Пуриспа Турхан Крахвинин йӑхӗ тавра пулса пыраҫҫӗ. Пурис Павӑлӗпе ун арӑмӗн Вирккан ҫичӗ ывӑл, ҫиччӗшӗ те аслӑ шкул пӗтернӗ (Мишша Сениэль поэт, Иван Егоров прозаик, Николай ялти шкул директорӗ, Петӗр Ҫӗнӗ Шупашкарти музыка шкулӗн ертӳҫи, Кӗркурипе Ҫергей - чӑваш чӗлхине вӗрентекенсем, кил тӗпчекӗ – ял композиторӗ - Тимӗр тата икӗ хӗр – Зина, вӑл Тутарстанрах вӑрман урлӑ ялтах пурӑнать, Лиза радиотелеграфистка вара Шупашкар ҫумӗнчи Шахчӑрта хӑйӗн кил-ҫуртне тытса тӑрать,. Кӗнекесенче вӗсен кун-ҫулне тӗплӗн те пур енлӗн пӗр сиктермесӗрех йӗрлесе пынӑ. Ялти ҫынсем те пӗри юлми кӗнекене кӗнӗ пулмалла. Унта Упаҫпа карчӑкӗ, Ехмет, Кашук, Тилюк, Акӑлай, Шалҫа, Пайтул Ҫеркки, Исмук, Куракпа Чӗкеҫ, Сарепи, Паҫҫа, Левен, Сидор Миронович Касантей, Вӗри Харенович тата ытти теҫетке ҫын ҫаврӑнать -ӗҫлеҫҫӗ, ӗҫеҫҫӗ, вӑрлаҫҫӗ, сӑхланаҫҫӗ, кӗвӗҫеҫҫӗ, улталаҫҫӗ, элеклеҫҫӗ, сутаҫҫӗ, ҫапӑҫаҫҫӗ, ҫунаҫҫӗ, вилеҫҫӗ.

Вилнисене чӑваш йӑлипе мунча кӗртсе асӑнни, тӑвансемпе рет тухни, амӑшӗ «вӑрлӑх туртма» кайса ҫӳрени, ашшӗн тӗрмери тата вӑрҫӑри инкекӗсем, пӗтӗм ялпа вӑрманта утӑ ҫулни, кил-ҫурт ҫавӑрни, амӑшӗ Шур Хулари ывӑлӗ-хӗрӗ патӗнче виҫшер кун пурӑнса курни-шухӑшлани – тата ытти нумай ӳкерчӗке Иван Павлович Егоров хӑйӗн чӑн ятӗнченех питӗ ҫыпӑҫуллӑн, лайӑх фотоӳкерчӗкри пек пӗр ним сиктермесӗр «натурально» ҫӑтӑ-ҫӑтӑ ҫырса кӑтартнӑ. Ку енӗпе вӑл чӑннипех ӑста.

Иккӗмӗш кӗнекере те халӑх варкӑшать. Ҫӗршыв пӑтранать, СССР арканать. Пурис Павӑлӗн кил-йышӗнче те пӑтӑрмахсем тупӑнсах пыраҫҫӗ. Кинӗсем чӑвашла пӗлмеҫҫӗ, кӗҫӗнни сыпать, ял куштанӗсем юратмаҫҫӗ. Килти-ялти харкашу-тавлашусене амӑшӗ – Вера Григорьевна - пӗтӗм чун хавалӗпе те таса ӑсӗпе сӳнтерсе пырать. Иккӗмӗш кӗнекере ӗҫсем Шупашкарпа Ҫӗн Шупашкар енне куҫса килеҫҫӗ, Кунта Миша Сениэль ҫинчен ҫырни тата ун тавринчи ҫыравҫӑсен ячӗсем ытларах курӑнма пуҫлаҫҫӗ те виҫҫӗмӗш кӗнекене шӑкӑрин куҫаҫҫӗ. Такам та пур кунта, анчах пурте пекех – хура сӑн-сӑпатпа, тиркевлӗ питпе, хитре мар ӗҫпе.

Ӗмӗрӗме чӑваш литературипе ҫыравҫисем хушшинчех ирттертӗм пулсан та, эпӗ кӗнекере ҫырса кӑтартнӑ хӑшпӗр ӗҫ-пуҫ ҫинчен хӑлха хӗррипе кӑшт-кашт ҫеҫ илткеленӗ. Иван Егоров кӗнекине вулатӑп та, нумайӑшне ӗнененес те килмест. Тата мана киревсӗр сӑмахсем кӗртсе яни, ҫынран хӑйӗнчен килмен инкекшӗн вӗчеленсе виртлени килӗшмерӗ. Пӗр тӗслӗх ҫеҫ илетӗп. Эпӗ Ипполит Иванов ҫыравҫӑпа, хаҫатҫӑпа, литература тӗпчевҫипе, кӗнекеҫӗпе нумай ҫул пӗрле ӗҫлерӗм. Паттӑр фронтовик ман аса уҫӑ чунлӑ, ҫынна ӑнланма пӗлекен тарават ҫын сӑнӗпе кӗрсе юлчӗ. Вӑл Михаил Сениэль кӗнекисем пирки ырласа ҫырнӑ статьясемпе студентсем умӗнче калаҫнӑ чухне усӑ кураттӑм. Пӑхӑсӑн, романра Ипполит Иванович ӗнчӗхечӗсене (рецензийӗсене) тата вилӗмне питех те нӗрсӗр туса кӑтартнӑ. Пурнӑҫра ҫаплах пулнӑ-тӑр, ҫамрӑк арӑмӗ чирлӗ ҫынна хиселемен-тӗр – анчах фронтовика ӑшпиллӗ хӗрарӑм тӗлне пулманшӑн ҫав териех тиркемеллеччӗ-и. Темле хаяр питлес пулсан та, халран кайнӑ фронтовик инкекне халӑх моралӗпе хак пама тӑрӑшмаллаччӗ пулӗ.

Халӗ пурӑнакан ҫыравҫӑсене те романра шутсӑрах хытӑ лӑсканӑ. Тӗрӗсех лектернӗ пулмалла, мӗншӗн тесен вӗсенчен пӗри те хирӗҫлесе тӳрре тухнине курмарӑм. Илтмен, вуламан темелли ҫук, мӗншӗн тесен ку тиркев сӑмахӗсем унчченех Михаил Сениэлӗн автобиографийӗнче, статйисемпе камитӗнче пичетленсе тухнӑ, вулавӑшсене ҫитнӗ.

Ятран тӳррӗн тӗллесе ырлани-тиркени кӗнекесенче нумай мар. Ыттисем йӑлтах Иванмучилле ятсем: Питӗрпе Упнер Касантейсем, Уксак Якку, Услей Данилов-Комодри, Кӑмкан, Сажикалкин, Урлӑ Лав, Йӗмӗ аннӑ Натоль-Матоль (Хан Патти), Утлан, Юхха Лаҫҫипе М. Евлепи, Пурхиле Агафонов, Х. Уйташ, Шӗвӗ Сӑмала, Хура Чаршав, Тивет-Кель, Хветӗр Кивер, Валяй Нафуй, Емтип Каҫҫи, Ясарпи Лайкки... Вӑл тесен - вӑлах, урӑххисем тесен – вӗсем мар, литература сӑнарӗсем. Анчах литературӑпа мӗн чухлӗ те пулин кӑсӑкланакан ҫыншӑн хӑшӗ кам пулни куҫа хупса пӑхсан та курӑнать.

...Эпӗ 1937-1939 ҫулсенчи пухусемпе ларусен протоколӗсене тӗплӗ вуланӑччӗ, вӗсенчен ҫырса илнисем те манӑн архивра пайтах. Унта ҫыравҫӑсемпе журналистсем пӗр-пӗрне, ҫывӑх юлташӗсем пулнӑ ҫынсенех, «халӑх тӑшманӗ» туса сӗмсӗррӗн кӑшлани тем чухлӗ. Халӗ Иван Егоров кӗнекинче ҫыравҫӑсемпе хутшӑннӑ культура ертӳҫисем (Тимӗр Иванӗ, Кати Ульки, Маҫак, Т. Парасова, Хӗрлӗ Петте) ҫинчен каланине вулатӑп та, унта ҫырнисенчен ытларахӑшӗ тӗрӗсех пулӗ тесе шутлатӑп, мӗншӗн тесен ертӳҫӗ тӳресен хура тискерлӗхне манӑн хамӑн та сахал мар чӑтма тивнӗччӗ. Чӑваш писателӗсемпе журналисчӗсен ӑш-чикӗ ку таранччен те элекпе кӗвӗҫӳрен, саморекламӑпа ҫӑткӑнлӑхран, вӑрттӑн ҫыртас йӑларан тасалса ҫитменнинчен, вӗсем уҫҫӑнах икӗпитлӗн явкалланинчен хытах тӗлӗнетӗп. Чӑвашӑн чӑнласа чӑмӑртаннӑ наци интеллигенцийӗ паян кун та ҫук, пуласси пӑхса курӑнмасть. Халӗ пултаруллисене пиҫмен пашалусем эшкерӗпе сиксе ларса хӗсни-туллани курӑнмасть пек, анчах чӑваш ҫыравҫисем паян - хивре самант тӑван чӗлхе вӗрентӗвӗ ҫинчен калаҫма хытӑ хистенӗ чухне - чӑваш чӗлхине, халӑх малашлӑхне хӳтӗлесе сӑмах чӗнейменни вӗсем Иван Егоров ҫырса кӑтартнӑ шайран ҫӳле хӑпарайманнине уҫса парать пулӗ тетӗп.

Иван Егоров кӗнекинче чӑваш ял ҫыннисемпе Шупашкарти ҫыравҫисен тӗнчи ҫутӑ енчен тӗттӗмелле пӑхсан мӗнле курӑнни ӳкерӗннӗ. Вӑл курӑну хаваслӑ мар. Ҫавӑнпах ӑна илемлӗ литература хайлавӗ тесе калакан сахал тупӑнӗ. Документсен тишкерӗвӗ теме те ҫук. Ман шутпа, виҫ кӗнекеллӗ «Ҫутӑ тӗнче» романри пурнӑҫ – ХХ ӗмӗрти чӑваш кунҫулӗн сӑнтӗкӗрте тӳнтеррӗн сӑнланнӑ мӗлки. Анчах вӑл мӗлке – чӑн пурнӑҫра пулни.

Литература историйӗнче, тӗпчевҫӗсемпе вулакансен куҫӗ умӗнче пирӗн тӑван сӑмахлӑхӑн таса хӑвачӗ йӑла тиркевӗпе хупланса ан юлтӑр тесен, тӗпчевҫӗсемпе ҫыравҫӑсен хӑйсен чӑн сӑмахне каламаллах. Кӗнеке пур, ӑна курмиш пулса юлаймӑн, унта ҫырнине кусарпа хырса, шывпа ҫуса тасатаймӑн. Эппин, авторӗ пурӑннӑ чухнех тӗрӗссине тӗрӗс, суйнине суя тесе калани истори чӑнлӑхӗшӗн кирлӗ пулать.

 

Виталий Станьял

Иван Егоровӑн ӳкерчӗкне «Хыпар» сайтӗнчен илнӗ.

 
Editorial note: The publication of articles does not mean that the editorial board shares the opinion of its authors.
[Comments (22)]

Comments:

Армути // 3570.01.5144
2017.12.21 05:29
Славика калани: Станьял мифа "хаймак" тет, сочинение - "хайлӑк, статьяна - "хӑтав", повеҫе -"халай", романа"сӑскан, редактора "тӗремен" тет"Чӑваш литературин вӗрентӳ меслечӗсем " кӗнекинче. Лекцисенче те ҫапла калатчӗ,мӗнле пулӑмне ӑнлантаратчӗ, "Сӑскан"- тӗрӗк сӑмахӗ тенине астӑватӑп, те "миме", те "сӑмах" тенинчен-и? Халь каламастпӑр та,манса кайнӑ иккен-мӗн.
Serzh // 4266.15.9496
2017.12.21 08:46
Чăн малтан И. Егоров романне çырса кун çути кăтартса ашшĕ-амăшĕ валли çыруллă палăк лартнă. Ку питĕ пархатарлă ĕç.
Иккĕмĕшĕнчен, пиччĕшĕпе шăллĕн ( М. Сениэльпе И. Егоровăн) шăписем ытла та тумхахлă пулчĕç. Пĕрне хăй вăхăтĕнче влаç творчествишĕн ''антисоветчик'' тесе те айăпланă, темиçе хут та шăпланма хушнă, 1978 çулта çамрăк поэтăн ''Юрату юрри'' ятлă тухас кĕнекине издательствăра ушкăнпа сÿтсе явса пĕр саслăн пулса сивленĕ, хурласа тăкнă, çав кунсенчех çунтарса (!) та янă.
Теприне (ун чухне ултă кĕнеке авторне) темиçе çул хушши СССР Çыравçăсен Союзне илмесĕр муталанă, Сениэль шăллĕ тесе хайлавĕсене темплана кĕртмен. Кĕртсен те кайран кăлара-кăлара пăрахнă е тетрадь пек кăна пичетлесе кăларнă.
Вулакан // 4157.8.2636
2017.12.21 23:48
Лайăх, лайăх, кăсăк япала. Унашкалли те кирлĕ литературăраю
Базиль Кириллов // 2971.03.9695
2017.12.22 14:54
Сниэль кӗнекине мӗншӗн кӑларттарманни пирки Аристарх ҫапла каласа панӑччӗ: Александр Галкин тӗп редактор ун кӗнекинчен 5-6 сӑвва (ытла йӑваш тесе) кӑларса ывӑтма хушать те отпуска каять, Тухнӑ ҫӗре "таса листасем" килсе выртнӑ, Галкин уҫса пӑхать те вӑл хушнине сӗмсӗррӗн итлеменнине курать, хайхи "шӗвӗ" йӗркесем ним мар чӳхенсе тӑраҫҫӗ. Хӑйӗн влаҫӗпе усӑ курса тӗппи Сениэль кӗнекине "тӗплет". Кайран ҫакна авторӗ, ун хыҫҫӑн шӑллӗ, хӑюллӑ сӑвӑсемшӗн тытса чарчӗҫ тесе кӑкӑр ҫапса ҫӳренӗ.
Валери Туркай // 2428.23.9102
2017.12.23 12:59
Акташ, КАМПА мухтанатӑн эсӗ?
Сениэльпе-и, Иван Егоровпа-и?
МӖН пур Сениэлӗн мухтанмалӑх?
МӖН пур Иван Егоровӑн мухтанмалӑх?
МӖН?!
Иван Егоровӑн "Ҫут тӗнче" "романӗ" вӑл (И.Егоров роман МӖН иккенне пӗлет-ши?) - ҫӗрӗк ҫӑмарта.
Эпӗ ку пакӑҫ хайлава, 2004 ҫулта 100 экземплярпа тухнӑскере, вуланӑ, ҫавӑнпа та сӑмах мӗн пирки пыни ҫинчен пӗлетӗп.
Пароноик Иван Егоровшӑн пурте "пӑх купи" - Петӗр Хусанкай та, Атнер Хусанкай та, Ухсай та, Сементер те, Айташ та, Порфирий Афанасьев та, Смолин та, Сарпи те, ыттисем те...
Малтан ВУЛӐР, унтан хаклӑр!
Валери Туркай. 8-927-855-54-80
Пĕр хĕрарăм // 1708.63.9390
2017.12.23 14:59
Туркай мĕн калама пултарать-ши Денис Гордеевăн "Хăямат"повеçĕ çинчен?
Serzh // 9379-1938
2017.12.24 12:13
Хамăн ентешсене никама та хур кÿме мамастăп! Валери Туркай йăнăшать. Усал сăмахсемпе хăртма ана никам та ирĕк паман!
Михаил Сениэль поэт нумай-нумай паха япаласем çырса хăварнă. Унăн çăлтăрĕ халĕ те çунать. Эп астроном пулнă пулсан, хальтерех уçнă планетăсен пĕрне унăн ятне панă пулăттăм. Иван Егоров çыравçă та талантсăр писатель мар.
Туркайăн хăйĕн мĕр пур-ха? Сăмах май каласан, темиçе çул каярах пĕр ача сатĕнче Хĕл Мучи пулма тÿр килчĕ. Сăвă лайăх вуланă арçын ачаран ыйтрăм: ''Ачам, эс мĕн ятлă?'' ''Эпĕ - Владик Петров!!'' - тесе хуравларĕ улттăри ача, пĕчĕк кăкăрне çапса.))))))))))
''Çут тĕнче'' романа вара пурне те вуласа тухма сĕнетĕп. Унта нумай çыравçăсен тата çыравçă пеккисен сăнарĕсене яр-уççăн сăнласа кăтартнă.
Çав сынах // 3000.76.3861
2017.12.24 16:19
Юпитер, ты сердишься, значит, ты не прав. Чăн та, Туркайăн Юпитер патне кармашма нумай пăтă çимелле-ха... Иван Егоровăн романĕнчи сăнарсем пурте – чăн çынсем. Çапларах пирĕн литература...
Agabazar // 7117-1376
2017.12.24 23:06
Agabazar
Кам Михаил Сениэлĕн Геннадий Айхие пародилесе çырнă "Хайхисем — Хайхисемпе" сăввине пĕлет?

<<Çав сынах // 3000.76.3861
2017-12-24 16:19
Юпитер, ты сердишься, значит, ты не прав. >>


Чăвашла калаç.

"Сӑскан"- тӗрӗк сӑмахӗ тенине астӑватӑп, те "миме", те "сӑмах" тенинчен-и? Халь каламастпӑр та,манса кайнӑ иккен-мӗн.

Чăваш Сăскан ял пур (Чĕмпĕр облаçĕ, Мелекес районĕ).
Валери Туркай // 2125.26.2677
2017.12.25 08:44
Иван ЕГОРОВ "Ҫут тӗнче" "роман", 3-мӗш кӗнеке, 257-мӗш страница:
"Эпӗ, Питтӑр Питрович (сӑмах кунта Петӗр Хусанкай пирки пырать, И.Егоров аслӑ сӑвӑҫӑмӑра "Касантей" тет - В.Т.), сан шӑллу мар, - терӗ Мишша (Михаил Сениэль - В.Т.), ӑна ӳрӗк-сӳрӗк те вилӗ куҫӗнчен чӑрлаттарса пӑхса, санашкал, чунне шуйттана сутнӑ ҫынна ал памастӑп, йӗрӗнетӗп".

Мӗн, "Ҫав ҫынах", ҪАКӐ та - Петӗр Хусанкай пирки "чунне шуйттана сутнӑ ҫын" тени те килӗшет-и сана?..
Эп кунта пӗр пӗчӗк "йӑваш тӗслӗх" ҫеҫ илсе кӑтартрӑм-ха...
Сӑмах май каласан, Сениэльпе Иван Егорова лайӑх пӗлекен Юрий Сементер "Ҫут тӗнче" ятлӑ лӑпӑр-лапӑра Иван Егоров мар, Сениэль хӑй ҫырнӑ тесе ҫирӗплетет. Кун пек калама чӑнах та май пур.
Валери Туркай

Pages: 1, [2], 3

Comments

Your Name:
Your Comment:
B T U T Headline1 Headline2 Headline3 # X2 X2 Image http://
WWW:
ĂăĔĕÇçŸÿ
Symbols used: 0 symb. Maximum symbols: 1200 symb.
CLICK HERE to choose from a number of free Chuvash keyboard layout software.
 

Supported HTML Tags:

<i>...</i> <b>...</b> <u>...</u> <s>...</s> <a>...</a> <img> <h1>...</h1> <h2>...</h2> <h3>...</h3> <pre>...</pre> <sub>...</sub> <sup>...</sup> <ul> <ol> <li>

Orphus

In Other Languages

Banners

Counters