Юхма Мишши хатӗрленӗ «Ылтӑн ҫӳпҫе» кӗнекери статьясемпе малалла паллаштаратпӑр. Аса илтеретпӗр, кӗнекен иккӗмӗш ячӗ — «Чӑваш сӑмахӗсен вӑрттӑнлӑхӗ». Ӑна 1993 ҫулта кӑларнӑ («Вучах» библиотекинче).

Туркменсем, узбексем тата Вӑтам Азири ытти халӑхсем вӗҫӗ-хӗррисӗр хӑйӑрлӑ пуш-хирти хытса ларнӑ тикӗс вырӑна такыр теҫҫӗ. Чӑваш чӗлхинче те «такӑр» сӑмах пур. «Акар ҫулӗ тап-такӑр, уйӑх ҫути ҫап-ҫутӑ», — ҫырать пирен аслӑ поэтӑмӑр К. Иванов-Пӑртта хӑйен «Тимӗр тылӑ» юмахӗнче. Такырпа такӑрӑн пӗлтерӗшӗ пӗрех, ӗлӗк чӑваш чӗлхинчи такӑр та пушхирти хытса ларнӑ тикӗс вырӑнах пӗлтернӗ. Кайран, чӑвашсем хӑйӑрлӑ пушхирсейчен тухса ҫурҫӗрелле кайсассӑн та, ҫак сӑмах чӗлхерен ҫухалман, вӑл вара хӑйӑрлӑ пуш-хирпе мар, ҫулпа е уй-хирпе ҫыхӑнса упранма тытӑннӑ.

Такӑр сӑмахӑн пӗлтерӗшне ӑнлантарнӑ май ҫакна та калас килет. Пирӗн, чӑвашсен, пӗтӗм пурнӑҫ тымарӗ — тухӑҫра, анчах эпир чылай чухне, ҫакна манса кайса, хамӑр культурӑн никӗсӗ шутланакан сийсене е сӑмахсене сирсе яратпӑр, ку пирӗн мар, ку вӑл — тутарӑн, тесе калатпӑр. Тутарпа чӑвашсем — пӗр тымартан, ҫавӑнпа пӗр сӑмахах е пулӑмах тутарсен те, чӑвашсен те пулма пултараҫҫӗ.